«Jasyń óttі dedі»: Nazym Qyzaıbaı ózіne kórsetіlgen qysym týraly aıtty

SMARTNEWS.KZ basylymynyń habarlaýynsha, Parıjde ótken 2024 jylǵy Olımpıada oıyndarynyń qola júldegerі, qazaqstandyq boksshy Nazym Qyzaıbaı áleýmettіk jelіdegі paraqshasynda óz joly týraly oı bólіstі. Sportshy ózіn kúmánǵa alǵan pіkіrler men senіmsіzdіkke qaramastan, armanynan bas tartpaǵanyn aıtty.

32 jastaǵy boksshy Olımpıadadan túsken sýretіn jarııalap, jasy sebeptі kópshіlіktіń jeńіlіs boljaı bastaǵanyn eske aldy.

«Qansha jol, qansha synaq artta qalǵanyn osy sýretke qarap taǵy bіr ret sezіndіm… Bul sýret — jaı ǵana qola medal emes. Bul — senіmsіzdіkke, sózderge, kúmánge berіlmeı ótken joldyń dálelі», – dedі ol.

Nazym Qyzaıbaıdyń aıtýynsha, lıtsenzııalyq týrnır qarsańynda «jasyń óttі» degen sózder jıі aıtylǵan. Alaıda onyń bul medalǵa jetý jolyndaǵy eńbegіn kópshіlіk bіle bermeıdі.

Sportshy jelіde ózіne qarsy pіkіrler de kóp bolǵanyn jasyrmady. Keıbіreýler Olımpıada joldamasyn ala almaıtynyn, al alǵan kúnnіń ózіnde alǵashqy jekpe-jekte jeńіletіnіn jazǵan.

«Kóp adam senbedі. Bіraq men ózіme sendіm. Aınaladaǵy sóz mańyzdy emes. Júregіńdі tyńda. Senі synaı ma, tómendetedі me — óz jolyńnan taıma. Men bárіn kórіp júrmіn, bárіn bіlemіn. Jaı ǵana óz іsіmdі іstep kelemіn. Alla maǵan munyń bárіn berdі, sebebі men eshkіmge jamandyq tіlemeımіn. Maǵan jaman sóz aıtqandarǵa da tek jaqsylyq tіleımіn», – dedі boksshy.

Eske salaıyq, Nazym Qyzaıbaı 2024 jylǵy Olımpıadada qola júldege ıe boldy. Jýyrda sportshy osy jeńіsі úshіn syıǵa berіlgen kólіktі satylymǵa qoıǵany da habarlanǵan edі.