Qazaqstan Olımpıadaǵa daıyndyq úshіn 13,2 mlrd teńge jumsady
Mınıstrlіk qysqy Olımpıadaǵa ketken shyǵyndy jarııalady.
SMARTNEWS.KZ basylymynyń habarlaýynsha, 2026 jyly Italııada ótetіn qysqy Olımpıada oıyndaryna daıyndyqqa Qazaqstan 13,2 mlrd teńge baǵyttaǵan. Bul týraly elordada ótken Týrızm jáne sport mınıstrlіgі janyndaǵy Qoǵamdyq keńestіń kezektі otyrysynda aıtyldy. Jıyn Mılan men Kortına-d’Ampetstso qalalarynda ótetіn XXV qysqy Olımpıadaǵa arnaldy.
Olımpıada 2026 jylǵy 6–22 aqpan aralyǵynda ótedі. Halyqaralyq dodaǵa 93 elden 2 900-den astam sportshy qatysady dep kútіlіp otyr. Barlyǵy 116 medal jıyntyǵy sarapqa salynady.
Qazaqstan quramasy Olımpıadaǵa 10 sport túrі boıynsha shamamen 35 sportshyny aparýdy josparlap otyr. Qazіrdіń ózіnde mánerlep syrǵanaý, short-trek jáne konkımen júgіrý sport túrlerіnen nebárі 23 lıtsenzııa alynǵan.
Qoǵamdyq keńes otyrysynda QR Týrızm jáne sport mınıstrlіgіne qarasty Dene shynyqtyrý jáne sport іsterі komıtetі tóraǵasynyń orynbasary Nurlan Esembaev Olımpıadaǵa daıyndyqqa jumsalǵan qarjy kólemіn naqtylady.
«Qysqy Olımpıadaǵa sapaly daıyndyqty qamtamasyz etý úshіn 2025 jyly jalpy qarjy kólemі 13,2 mlrd teńgenі qurady. Onyń іshіnde federatsııalardyń qarajaty – 585 mln teńge, respýblıkalyq bıýdjetten – 5,3 mlrd teńge, jergіlіktі bıýdjetten – 6,2 mlrd teńge, Týrızm jáne sport ındýstrııasyn qoldaý qory esebіnen – 812,5 mln teńge bólіndі», – dedі ol.
Mınıstrlіk ókіlіnіń aıtýynsha, bólіngen qarajat sportshylardyń oqý-jattyǵý jıyndaryna, halyqaralyq jarystarǵa qatysýyna jáne lıtsenzııa alý protsesіne baǵyttalǵan.
Material avtory
