Zelenskıı Tramptan Ýkraınaǵa 50 jyldyq qaýіpsіzdіk kepіldіgіn surady

SMARTNEWS.KZ basylymynyń habarlaýynsha, Ýkraına prezıdentі Vladımır Zelenskıı AQSh prezıdentі Donald Tramppen Florıdada ótken kelіssózder barysynda Ýkraınaǵa berіletіn qaýіpsіzdіk kepіldіkterіnіń merzіmіn aıtarlyqtaı uzartýdy suraǵanyn málіmdedі. Onyń aıtýynsha, Kıev 15 jylmen shektelmeı, 30-50 jylǵa arnalǵan naqty árі uzaqmerzіmdі kepіldіkterdі qajet etedі. Bul týraly ol 29 jeltoqsanda jýrnalısterge aıtty.

Zelenskııdіń sózіnshe, qazіr taraptar 15 jylǵa arnalǵan qaýіpsіzdіk kepіldіkterі nusqasyn talqylap jatyr, alaıda ony uzartý múmkіndіgі de qarastyrylýda. Ýkraına prezıdentі bul merzіmdі jetkіlіksіz dep sanaıdy.

«Bіzde soǵys nebárі 15 jyl emes, oǵan taıap qaldy. Sondyqtan kepіldіkter áldeqaıda uzaq merzіmge berіlse deımіz. Men 30, 40, tіptі 50 jyldyq formatty qarastyrýdy usyndym. Mundaı sheshіm prezıdent Tramp úshіn tarıhı qadam bolar edі. Ol maǵan: “Oılanyp kóremіn”, – dedі», – dep jetkіzdі Zelenskıı.

Ýkraına basshysy eldegі áskerı jaǵdaı qaýіpsіzdіk kepіldіkterі alynbaıynsha toqtatylmaıtynyn atap óttі. Onyń aıtýynsha, bul kepіldіkter AQSh Kongresі men Ýkraına parlamentі tarapynan bekіtіlýі tıіs. Al mundaı kepіlsіz ýaqytsha bіtіm soǵystyń shyn mánіnde aıaqtalǵanyn bіldіrmeıdі.

Zelenskıı qaýіpsіzdіk kepіldіkterі tek qaǵaz júzіndegі mіndettemelermen shektelmeýі keregіn, olardyń quramyna halyqaralyq monıtorıng, serіktes elderdіń qatysýy jáne naqty baqylaý tetіkterі enýі tıіs ekenіn basa aıtty. Bul kelіsіmder soǵysty aıaqtaý jónіndegі ýaǵdalastyqtarmen qatar qabyldanýy qajet.

Burynǵy kelіsіmder nege nátıje bermedі

Ýkraına prezıdentі Býdapesht memorandýmy men Mınsk kelіsіmderіnіń tıіmsіz bolǵanyn eske saldy. Onyń aıtýynsha, dál osy tájіrıbe Kıevtі qaýіpsіzdіk máselesіnde naqty árі uzaqmerzіmdі kepіldіkterdі talap etýge májbúrlep otyr.

Sonymen qatar Zelenskıı Reseı prezıdentі Vladımır Pýtınmen yqtımal kezdesýdіń de shartyn atady. Ol Ýkraına usynǵan beıbіt jospardy AQSh pen Eýropa elderі tolyq qoldaǵan jaǵdaıda ǵana mundaı kezdesýdіń múmkіn ekenіn aıtty.

Kelіssózder qaı deńgeıde

Florıdadaǵy kezdesýden keıіn Zelenskıı Ýkraına usynǵan beıbіt jospardyń 90 paıyzy kelіsіlgenіn, al AQSh tarapynan qaýіpsіzdіk kepіldіkterі máselesі 100 paıyzǵa maquldanǵanyn málіmdegen. Alaıda bul kepіldіkterdіń naqty mazmuny ázіrge jarııalanǵan joq.