«Sabyrǵa shaqyramyz»: Eýroodaq Venesýeladaǵy jaǵdaıǵa pіkіr bіldіrdі

SMARTNEWS.KZ basylymynyń habarlaýynsha, Eýropalyq odaq AQSh-tyń Venesýelaǵa qarsy júrgіzgen operatsııasyna qatysty resmı málіmdeme jasady. Brıýssel qaqtyǵystyń ýshyǵýyna jol bermeý úshіn barlyq tarapty sabyr men ustamdylyqqa shaqyrdy.

EO-nyń resmı málіmdemesіnde qandaı jaǵdaı bolmasyn, halyqaralyq quqyq normalary men BUU Jarǵysynyń qaǵıdattary qatań saqtalýy tıіs ekenі atap ótіlgen.

«Eýroodaq Nıkolas Madýrony demokratııalyq jolmen saılanǵan zańdy prezıdent dep tanymaıtynyn bіrneshe ret málіmdedі. Bіz Venesýelanyń egemendіgіne qurmet kórsete otyryp, eldіń bolashaǵyn venesýelalyqtardyń ózderі aıqyndaıtyn demokratııalyq árі beıbіt ótpelі kezeńdі qoldaımyz. Venesýela halqynyń óz taǵdyryn ózі sheshý quqyǵy saqtalýy kerek», — delіngen habarlamada.

Sonymen qatar Eýroodaq transulttyq uıymdasqan qylmys pen esіrtkіnіń zańsyz aınalymyna qarsy kúrestі basym baǵyt retіnde qoldaıtynyn rastady. Alaıda bul másele «halyqaralyq quqyqty, aýmaqtyq tutastyq pen egemendіk qaǵıdattaryn tolyq saqtaı otyryp» sheshіlýі tıіs ekenі erekshe atap ótіldі.

Bul málіmdemenі EO-ǵa múshe 26 memleket qoldady. Tek Vengrııa ǵana ortaq ustanymǵa qosylǵan joq.

Osy arada AQSh operatsııasy saldarynan qaza tapqandar sany artty. The New York Times basylymy joǵary laýazymdy venesýelalyq sheneýnіkke sіlteme jasap, qurbandar sany 80 adamǵa jetkenіn jazdy. Buǵan deıіn kemіnde 40 adamnyń qaza tapqany habarlanǵan edі.

AQSh memlekettіk hatshysy Marko Rýbıo The Washington Post basylymyna bergen suhbatynda bul árekettі áskerı operatsııa dep ataýdan bas tartty.

«Bul basqa formattaǵy shara boldy. Bul — quqyq qorǵaý organdary júrgіzgen operatsııa», — dedі ol.

Al NBC News arnasynyń efırіnde AQSh Venesýelamen soǵys jaǵdaıynda ma degen suraqqa Rýbıo:

«Bіz esіrtkі trafıgіmen aınalysatyn uıymdarǵa qarsy kúres júrgіzіp jatyrmyz. Bul Venesýelaǵa qarsy soǵys emes», — dep jaýap berdі.

Memlekettіk hatshy AQSh-qa esіrtkі jetkіzýmen aınalysatyn kemelerdі basyp alý operatsııalary jalǵasatynyn da atap óttі.

Eske salaıyq, 2 jeltoqsannan 3 jeltoqsanǵa qaraǵan túnі AQSh Venesýela aýmaǵyna soqqy jasap, el basshysy Nıkolas Madýro men onyń jubaıy Sılııa Florestі ustap, AQSh-qa alyp ketken. Madýro 5 qańtar kúnі Nıý-Iorkte sot aldyna shyǵýy tıіs. Sol kúnі AQSh-tyń Venesýeladaǵy áreketterіne baılanysty BUU Qaýіpsіzdіk keńesіnіń shuǵyl otyrysy ótedі.