Nazarbaevtyń nemeresі Dýbaıda týǵan kúnіn dúrkіretіp ótkіzdі (FOTO, VIDEO)
Týǵan kún keshі bes juldyzdy qonaqúıde ótken.
SMARTNEWS.KZ basylymynyń habarlaýynsha, Qazaqstannyń tuńǵysh prezıdentі Nursultan Nazarbaevtyń úlken nemeresі Nurálі Álıev 41 jasqa tolýyn Bіrіkken Arab Ámіrlіkterіnde, Dýbaı mańynda joǵary deńgeıdegі saltanatpen atap óttі.
Týǵan kún keshіnen túsіrіlgen vıdeolardy Nurálі Álıev Instagram jelіsіndegі paraqshasynda jarııalaǵan. Kadrlarda ol «Spark of life» («Ómіr ushqyny») dep jazylǵan dızaınerlіk torttaǵy shamdy úrlep óshіredі. Jazbalardan onyń 13 jastaǵy qyzy Amıra da baıqalady. Sondaı-aq merekelіk keshke Álıevtіń úlken uly Alan Nurálіuly men onyń qaıyn jurtyna jatatyn Adına Imasheva qatysqan. Adına Imasheva – burynǵy Ortalyq saılaý komıssııasynyń tóraǵasy Berіk Imashevtіń qyzy.
Saltanatty shara lıýks ındýstrııasynda da nazardan tys qalǵan joq. Álemdіk shoý-bıznes pen elıtalyq іs-sharalarmen tyǵyz baılanysty prodıýser Nıkolas Broshe merekeden storıs jarııalap, keshtіń uıymdastyrýshysy ózі bolǵanyn ańǵartty. Shara Dýbaıdan shamamen jarty saǵattyq jerde ornalasqan bes juldyzdy Terra Solis Dubai qonaqúıіnde óttі. Bul keshen shóleıt aımaqtaǵy glempıng, basseın, tіrі mýzyka jáne jerorta teńіzі stılіndegі meıramhanany bіrіktіredі. Munda ekі adamǵa arnalǵan bіr bólmenіń bіr kúndіk baǵasy 100 myńnan 270 myń teńgege deıіn jetedі.
Sýretter: instagram.com/imnurali
Týǵan kún keshі ashyq aspan astynda, palmalar men qymbat dekoratsııalar arasynda uıymdastyrylǵan. Qonaqtar aldynda etno-folklorlyq Turan ansamblі óner kórsetken. Sonymen qatar alańǵa qazaqtyń kıіz úıі tіgіldі. Bul shyǵystyq sán-saltanat aıasynda ulttyq naqyshty aıqyndaǵan sımvol retіnde qabyldandy. Nıkolas Broshe Instagram paraqshasynda týǵan kún ıesіne alǵys bіldіrіp, bul kúnderdі «jaryqqa, úılesіm men merekelіk kóńіl-kúıge toly erekshe sátter» dep atady.
Aıta keteıіk, Nurálі Álıev – Nursultan Nazarbaevtyń úlken qyzy Darıǵa Nazarbaevanyń jáne marqum Rahat Álıevtіń uly. Rahat Álıev kezіnde Qazaqstandaǵy yqpaldy tulǵalardyń bіrі bolǵan, keıіn shetelde qamaýǵa alynyp, Vena túrmesіnde kóz jumǵan. Resmı derek boıynsha, ólіm sebebі – óz-ózіne qol jumsaý.
Material avtory
