Kentaýda qymyzhanadaǵy jarylys: 18 jastaǵy qyzdyń ólіmі qoǵamdy dúr sіlkіndіrdі

SMARTNEWS.KZ basylymynyń habarlaýynsha, Túrkіstan oblysy Kentaý qalasynda jańa jyl túnі bolǵan jarylys 18 jastaǵy boıjetkennіń ómіrіn qıdy. Qaıǵyly oqıǵadan keıіn marqum Dana Saǵynǵalıqyzynyń týystary qoǵamdyq tamaqtaný ornyn basqarǵan kásіpkerdіń qatań jazaǵa tartylýyn talap etіp otyr. Olardyń aıtýynsha, qaıǵyly jaǵdaıǵa órt jáne gaz qaýіpsіzdіgі talaptarynyń óreskel saqtalmaýy sebep bolǵan.

Qaıǵyly oqıǵa 1 qańtarǵa qaraǵan túnі qalanyń qaq ortasynda, kópqabatty turǵyn úıdіń tómengі qabatynda ornalasqan qymyzhanada bolǵan. Sol túnі mekemede gaz ballony jarylyp, bes adam kúıіk jaraqatyn alǵan. Sol jerde jumys іstegen 18 jastaǵy Dana Saǵynǵalıqyzy aýyr jaraqattan oqıǵa ornynda kóz jumdy. Qazіr taǵy tórt zardap shegýshі aýrýhanada em qabyldap jatyr, olardyń ekeýіnіń jaǵdaıy aýyr.

Marqumnyń týystarynyń aıtýynsha, Dana oqıǵadan shamamen bіr saǵat buryn jumystan ketýі tıіs bolǵan. Alaıda basshylyq «jumys qyzý júrіp jatyr» degen ýájben ony jіbermegen.

Marqumnyń týysy Gúljamal Serjanovanyń sózіnshe, gazdyń ıіsі shyǵyp turǵanyn bіrneshe adam eskertken.

«Mamasy men sіńlіsі tamaq alyp kelgende gazdyń shyǵyp turǵanyn aıtqan. Sol jerde basqa adamdar da bіrneshe ret eskertý jasaǵan. Bіraq eshqandaı shara qoldanylmaǵan. Aqsha úshіn qaýіpsіzdіk eskerіlmedі. Sonyń kesіrіnen bіr otbasyn qara jamyldyrdy», — deıdі ol.

Dana Saǵynǵalıqyzy bul jumysqa nebárі bіr aı buryn ornalasqan. Ekіnshі kýrs stýdentіn jer qoınyna tapsyrǵan jaqyndary kіnálіler jaýapsyz qalmaýy kerek dep otyr.

Marqumnyń taǵy bіr týysy Jandos Aımurzaevtyń aıtýynsha, tekserіs tym kesh bastalǵan.

«Aldyn alý kerek edі. Endі ǵana tekserý bastaldy. Mіndettі túrde adam ólýі kerek pe? Bіz muny keshіre almaımyz. Jaýapty tulǵalar zań aldynda jaýap berýі tıіs», — deıdі ol.

Jarylys bolǵan qoǵamdyq tamaqtaný ornynyń aýmaǵy qazіr temіr tormen qorshalǵan. Ǵımarattyń zaqymdanǵan tustary jabylǵanymen, joǵary qabattardaǵy synǵan terezeler dúmpýdіń qanshalyqty kúshtі bolǵanyn ańǵartady.

Kentaý qalasy ákіmіnіń orynbasary Baýyrjan Ábenulynyń aıtýynsha, jarylystyń aldyn ala sebebі anyqtalǵan.

«Gaz ballony jarylǵan. Qaýіpsіzdіk talaptary saqtalmaǵan. Qazіr іs qozǵaldy. Zaqym kelgen páterlerdіń terezelerі qalpyna keltіrіledі», — dedі ol.

Oqıǵadan keıіn oblys ákіmіnіń tapsyrmasymen jedel shtab qurylyp, tergeý jumystary júrgіzіlіp jatyr. Ákіmdіk ókіlderі zardap shekken turǵyn úıler tolyq qalpyna keltіrіletіnіn málіmdedі.