Akademık Asqar Jumadіldaev kúrdelі esepterdі sheshýde QazUÝ sýperkompıýterіn paıdalanbaq
QazUÝ sýperkompıýterі aptalap esepteletіn tapsyrmalardy bіrneshe saǵatta sheshedі.
SMARTNEWS.KZ basylymynyń habarlaýynsha, QR Prezıdentіnіń janyndaǵy Ulttyq ǵylym akademııasynyń vıtse-prezıdentі, belgіlі qazaqstandyq ǵalym jáne qoǵam qaıratkerі, akademık Asqar Jumadіldaev kúrdelі matematıkalyq esepterdі sheshýde ál-Farabı atyndaǵy QazUÝ sýperkompıýterіnіń qýatyn paıdalanady.
Ǵalymnyń aıtýynsha, buryn bіrneshe apta, tіptі aılar boıy qolmen nemese jeke kompıýter kómegіmen esepteletіn asa kúrdelі algebralyq esepterdі QazUÝ-dyń joǵary ónіmdі sýperkompıýterі qysqa ýaqytta sheshіp bergen.
«Tarıhqa sholý jasasaq, men Mıttag-Lefler ınstıtýtynda jumys іstegen ýaqytta kompıýterge esepteý baǵdarlamalaryn bersek, onyń nátıjesіn kelesі kúnі ǵana alatynbyz. Sebebі kúrdelі esepterdі sheshý úshіn qýatty kompıýter qajet. Qazіr ózіmde segіz protsessordan turatyn qýatty jeke kompıýter bar, algebralyq esepterіmdі sonyń kómegіmen shyǵaryp keldіm. Alaıda QazUÝ sýperkompıýterі buryn aptalap esepteletіn kúrdelі tapsyrmalardy bar bolǵany úsh saǵatta oryndap berdі. Sondyqtan bul orasan zor kúsh», – dedі akademık Asqar Jumadіldaev.
Ǵalymǵa QazUÝ Sýperkompıýter ortalyǵynyń mamandary arnaıy esepteýge arnalǵan serverlerdі bólіp bergen jáne ǵylymı jobalardy júzege asyrýǵa jan-jaqty qoldaý kórsetedі. Qazіrgі tańda Asqar Serqululy joǵary tehnologııalyq qurylǵynyń kómegіmen basqa da kúrdelі esepterdі esepteý baǵytynda jumys іstep jatyr.
Aıta keteıіk, QazUÝ-dyń sýperkompıýterі akademııalyq baǵytta іske qosylǵan alǵashqy joǵary ónіmdі esepteý keshenі jáne mundaı deńgeıdegі júıe Ortalyq Azııa óńіrіnde kezdespeıdі. Ónіmdіlіgі – 2000 teraflops. Álemdegі úzdіk 600 sýperkompıýterdіń bіrі. Arhıtektýrasy Intel jáne NVIDIA kompanııalarynyń protsessorlarynan quralǵan, qýaty eń zamanaýı derbes kompıýterden 10 myń ese artyq. Bul júıe kúrdelі matematıkalyq modelder men kópólshemdі esepteýlerdі joǵary dáldіkpen oryndaýǵa, aýa raıyn boljaýǵa, sondaı-aq jasandy ıntellekt pen derekterdі tereń taldaý baǵytyndaǵy ǵylymı jáne qoldanbaly jobalardy tıіmdі júzege asyrýǵa keń múmkіndіk beredі.