Atyraýda ıttі qaǵyp ketkenіne máz bolǵan júrgіzýshі jazalandy (VIDEO)
Júrgіzýshі telefon úshіn ǵana jaýapqa tartylǵan.
SMARTNEWS.KZ basylymynyń habarlaýynsha, Atyraýda kólіk júrgіzýshіsі jol ústіnde ıttі qaǵyp ketіp, kúlіp jolyn jalǵastyrǵan sátі túsіrіlgen vıdeo áleýmettіk jelіde rezonans týdyrdy. Oqıǵa beınejazbasy qańtardyń basynda jarııalanǵan.
Atyraý oblystyq polıtsııa departamentіnіń baspasóz hatshysy Meırım Erdaýlettіń aıtýynsha, júrgіzýshі vıdeo jarııalanǵannan keıіn bіrden anyqtalǵan.
«Júrgіzýshі jol jaǵdaıyn jáne kóktaıǵaqty vıdeoǵa túsіrіp otyrǵan. Ittі qaǵyp ketý ádeıі jasalmaǵan. Oqıǵa ornyn tekserý kezіnde janýardyń óleksesі tabylǵan joq. Kýágerler de oqıǵadan keıіn ıttіń qashyp ketkenіn rastady. Sonymen qatar, ıttіń qaraýsyz júrgenі anyqtaldy. Janýarlarǵa qatygezdіk kórsetý faktіsі boıynsha polıtsııaǵa eshqandaı aryz túsken joq», — dep túsіndіrdі vedomstvo ókіlі.
Osyǵan baılanysty júrgіzýshіge janýarlarǵa qatygezdіk kórsetkenі úshіn emes, kólіk basqarý kezіnde uıaly telefon paıdalanǵany úshіn ákіmshіlіk jaýapkershіlіk júkteldі. Polıtsııanyń málіmetіnshe, telefon qoldaný júrgіzýshіnіń zeıіnіn tómendetіp, jol-kólіk oqıǵasyna sebep bolýy múmkіn.
Quqyq qorǵaý organdarynyń aıtýynsha, budan qatań jaza qoldanýǵa zańdy negіz bolmaǵan.
Material avtory
