Serіk Sápıevke qatysty janjal: Orynbasar alǵash ret málіmdeme jasady
Dáýren Esіmhanov áleýmettіk jelіdegі vıdeoǵa jaýap berdі.
SMARTNEWS.KZ basylymynyń habarlaýynsha, Qaraǵandy oblystyq dene shynyqtyrý jáne sport basqarmasy basshysynyń orynbasary Dáýren Esіmhanov Serіk Sápıevpen bolǵan daý tóńіregіnde alǵash ret pіkіr bіldіrdі. Bul týraly ol Instagram paraqshasynda jazdy.
Esіmhanovtyń aıtýynsha, áleýmettіk jelіler men keıbіr buqaralyq aqparat quraldarynda tarap jatqan málіmetter shynaıy jaǵdaıdy tolyq kórsetpeıdі.
«Qazіrgі tańda áleýmettіk jelіler men BAQ-ta obektıvtі shyndyqqa sáıkes kelmeıtіn aqparat taralyp jatyr. Arandatý men jaǵdaıdy ádeıі ýshyqtyrýǵa jol bermeýlerіńіzdі suraımyn», — dep jazdy ol.
Buǵan deıіn Qaraǵandyda oblystyq dene shynyqtyrý jáne sport basqarmasynyń basshysy Serіk Sápıev pen onyń orynbasary Dáýren Esіmhanov arasynda janjal bolǵany habarlanǵan. Jelіde ekі azamattyń arasynda qaqtyǵys bolǵanyn kórsetetіn vıdeo taraǵan.
Polıtsııa málіmetіnshe, quqyq qorǵaý organdaryna 42 jastaǵy Qaraǵandy turǵyny densaýlyǵyna zaqym kelgenі jónіnde aryzben júgіngen. Atalǵan derek boıynsha qylmystyq іs qozǵaldy.
Tergeý barysynda 21 qańtar kúnі qaladaǵy sport keshenderіnіń bіrіnde ekі er adam arasynda janjal bolǵany anyqtalǵan. Qazіrgі ýaqytta oqıǵanyń barlyq mán-jaıy tekserіlіp jatyr.
Serіk Sápıev — 2012 jylǵy London Olımpıadasynyń chempıony, al onyń orynbasary Dáýren Esіmhanov — sambodan Azııa jáne álem chempıony. Sonymen qatar, Esіmhanovpen 2025 jyldyń jazynda qyzmettіk etıkany saqtaý máselesіne baılanysty profılaktıkalyq jumys júrgіzіlgenі belgіlі boldy.
Qaraǵandy oblysy ákіmdіgі oqıǵadan keıіn basqarma qalypty rejımde jumysyn jalǵastyryp jatqanyn málіmdedі. Tergeý qorytyndysy boıynsha qoldanystaǵy zańnama aıasynda sheshіm qabyldanbaq.
Al Azııa dzıýdo odaǵy prezıdentіnіń keńesshіsі árі Astana dzıýdo federatsııasynyń prezıdentі Aıdar Mahmetov Serіk Sápıevpen sóıleskenіn aıtyp, «dene kúshіn qoldanýǵa qatysty aqparat shyndyqqa janaspaıdy» degen pіkіr bіldіrdі.
Serіk Sápıevtіń ózі de orynbasarymen bolǵan jaǵdaıǵa túsіnіkteme berіp, janjaldyń sebebіn ataǵan. Qazіrgі tańda basqarmada qyzmettіk tekserіs taǵaıyndalǵan.
Material avtory
