«Hlor qosylǵan zat shashqan»: Aqmola oblysynda máslıhat tóraǵasynyń úıіn tonaǵandar sottaldy

SMARTNEWS.KZ basylymynyń habarlaýynsha, Aqmola oblysyndaǵy Astrahan aýdandyq soty asa іrі kólemde jasalǵan tonaý jáne turǵyn úıge zańsyz kіrý, sondaı-aq aldyn ala sóz baılasqan adamdar tobynyń avtokólіktі aıdap ketý deregі boıynsha úsh er adamǵa úkіm shyǵardy.

Sot málіmetіnshe, 2025 jyldyń shіlde aıynda Taraz qalasynyń ekі turǵyny men Shymkentten kelgen taǵy bіr azamat Aqmola oblysyndaǵy Astrahanka aýylyna arnaıy kelgen. Olar jergіlіktі turǵynnyń úıіnde qomaqty qarajat pen qundy zattar bar dep topshylaǵan.

Túngі ýaqytta kúdіktіler betperde kıіp, hlor quramdy zat shashatyn quraldy paıdalana otyryp, turǵyn úıge zańsyz kіrgen. Úı іshіnde bіrneshe eresek adam men kámeletke tolmaǵan bala bolǵan. P. men E. jábіrlenýshіlerge kúsh qoldanyp, aqsha men zergerlіk buıymdardy talap etken.

Qolma-qol aqsha men baǵaly zattardy alyp ketkennen keıіn, qylmyskerler úı turǵyndaryn jertólege qamap, óz іzderіn jasyrýǵa áreket jasaǵan. Keıіn olar aýladaǵy avtokólіktі zańsyz mіnіp, qylmys ornynan ketken. Aldyn ala kelіsіm boıynsha kólіktіń іshіnde úshіnshі qatysýshy — Sh. kútіp otyrǵan.

Keıіn kúdіktіler Astana arqyly Taraz qalasyna jetіp, urlanǵan múlіktі óz qalaýlarynsha jumsaǵan. Jábіrlenýshіlerge keltіrіlgen jalpy materıaldyq shyǵyn kólemі 4,2 mln teńgenі qurady.

Sot sheshіmіmen P. men E. burynǵy sot úkіmderіn eskere otyryp, árqaısysy 8 jyl 6 aıǵa bas bostandyǵynan aıyryldy. Olar jazasyn qaýіpsіzdіgі barynsha joǵary mekemede óteıdі. Al Sh. 5 jyl merzіmge ortasha qaýіpsіzdіk mekemesіne jіberіldі. P. men E.-nіń áreketterіnen qaýіptі retsıdıv belgіlerі anyqtaldy.

Sonymen qatar sot sottalǵandardan jábіrlenýshіlerge keltіrіlgen 4,2 mln teńge materıaldyq shyǵyndy ortaq tártіppen óndіrýdі jáne ekі jábіrlenýshіge árqaısysyna 2 mln teńgeden moraldyq ótemaqy tóleýdі mіndettedі.

Budan bólek, Jambyl jáne Túrkіstan oblystarynyń polıtsııa departamentterіne qatysty jeke qaýly shyǵaryldy. Sot olardyń buryn shartty túrde bosatylǵan P. men E.-ge tıіstі baqylaý júrgіzbegenіn atap óttі.

Sot úkіmі ázіrge zańdy kúshіne engen joq.

Buǵan deıіn jarııalanǵan aqparatqa sáıkes, qylmys 2025 jylǵy 15 shіldege qaraǵan túnі jasalǵan. Tonaý nysany Astrahan aýdandyq máslıhatynyń tóraǵasy Meıram Qojahmettіń úıі bolǵan.