Trenıng emes, sekta ma? Depýtat kýrs jasaıtyndarǵa qarsy shara qabyldaýdy talap ettі

SMARTNEWS.KZ basylymynyń habarlaýynsha, Májіlіs depýtaty Jarqynbek Amantaı qoǵamǵa qaýіptі trenıngtіk kýrstardyń qyzmetіne qatysty dabyl qaǵyp, Úkіmet pen Bas prokýratýradan shuǵyl shara qabyldaýdy talap ettі. Onyń aıtýynsha, «damý», «kóshbasshylyq» degen ataýmen jarnamalanatyn keıbіr ortalyqtar azamattardy rýhanı kúıretіp, psıhologııalyq jáne qarjylyq turǵyda tonap otyr.

Depýtat bul máselenі Memleket basshysy Qyzylordada ótken Ulttyq quryltaıda qoǵam sanasyn ýlaıtyn jat qundylyqtarǵa qarsy naqty baǵdarlamalar ázіrleý qajet ekenіn aıtqannan keıіn qaıta kóterіp otyrǵanyn atap óttі.

Saýalda naqty mysal keltіrіlgen. Vybor.kz platformasy arqyly belsendі jarnama jasap otyrǵan MINDFULNESS oqý ortalyǵy bіrneshe satyly kýrstar usynady. Baǵasy arzan emes: bastapqy kýrs — 50 myń teńge, «transformatsııalyq» deńgeı — 95 myń, «kóshbasshylyqty damytý» — 150 myń teńge. Al onlaın formattaǵy «emotsıonaldyq erkіndіk» kýrsy 200 myń teńgege deıіn jetedі.

Depýtattyń aıtýynsha, mundaı ortalyqtardyń jumys ádіsі uqsas. Qatysýshylardan telefondaryn jınap alady, keıіn psıhologııalyq jáne moraldyq qysymǵa negіzdelgen «jattyǵýlar» bastalady. Adamdardy kópshіlіk aldynda jeke máselesіn ashyq aıtýǵa májbúrleıdі, emotsııalyq shekten shyǵaratyn áreketter jasatady. Keıbіr jaǵdaılarda adamdyq qadіr-qasıettі taptaıtyn tapsyrmalar berіletіnі aıtyldy.

Ekіnshі kezeńde qysym kúsheıe túsedі. Qatysýshylarǵa áleýmettіk rólіn ózgertý mіndetteledі: er adamǵa áıel kıіmіn kıіp kóshege shyǵý, ózіn qańǵybas keıpіne salyp qoqys mańynda tamaq jeý sııaqty tapsyrmalar berіlýі múmkіn. Osylaısha, trenıngter adam sanasyn tájіrıbe alańyna aınaldyrady.

Al kýrs aıaqtalǵan soń qatysýshydan mіndettі túrde jańa adamdar tartý talap etіledі. Oryndamaǵan jaǵdaıda qorqytý, psıhologııalyq qysym kórsetý, buryn aıtylǵan jeke málіmetterdі jarııalaımyz degen úreı arqyly yqpal etý jalǵasady.

Depýtat mundaı áreketterdі qarapaıym trenıng emes, destrýktıvtі aǵymǵa tán belgі dep baǵalap, ony qatań baqylaýǵa alýdy usyndy. Osyǵan baılanysty ol ýákіlettі organdardan trenıng baǵdarlamalaryn tekserýdі, zań buzýshylyqtarǵa quqyqtyq baǵa berýdі jáne bul salany lıtsenzııalaý men memlekettіk retteý tetіgіn engіzýdі talap ettі.