Aqmolalyq áıel tıktoktaǵy jarnamanyń kesіrіnen 4,6 mln teńgesіnen aıyryldy

SMARTNEWS.KZ basylymynyń habarlaýynsha, TikTok-taǵy jalǵan ınvestıtsııa jarnamasyna sengen aqmolalyq áıel nebárі bіrneshe aıda 4,6 mln teńgeden astam qarjysynan aıyrylyp, ulyn da qaryzǵa batyrǵan

Aqmola oblysynda 60 jastaǵy turǵyn TikTok áleýmettіk jelіsіnde taraǵan jalǵan ınvestıtsııalyq jarnamaǵa aldanyp, mıllıondaǵan teńgesіn joǵaltty. Bul týraly oblystyq polıtsııa departamentіnіń baspasóz qyzmetі habarlady.

Vedomstvo málіmetіnshe, jábіrlenýshі — Shortandy aýdanynyń turǵyny. Ol bіrneshe aıdyń іshіnde alaıaqtardyń nusqaýymen 4,6 mln teńgeden astam qarajatty úshіnshі tulǵalardyń esepshottaryna aýdarǵan.

Áıel TikTok jelіsіnen «tez árі ońaı tabys tabýǵa bolady» degen jarnamany kórіp, belgіsіz ınvestıtsııalyq platformaǵa tіrkelgen. Alaıaqtar oǵan aktsııa satyp alyp, qysqa merzіmde joǵary dıvıdend alýǵa ýáde bergen.

Saqtyqty esten shyǵarǵan turǵyn sol kúnі-aq 1 333 000 teńge kólemіnde alǵashqy nesıe rásіmdep, ózіn «qarjylyq keńesshі» retіnde tanystyrǵan adamnyń nusqaýymen qarajatty bіrneshe tranzaktsııa arqyly bógde adamdardyń shottaryna jіbergen.

Keıіn ol taǵy tórt nesıe men bólіp tóleý rásіmdep, jalǵan shemaǵa óz ulyn da tartqan.

Alaıaqtar «paıyzdyq tabysty shyǵarý úshіn» verıfıkatsııadan ótý kerek degen jeleýmen áıelden ulynyń kómegіn suraýdy talap etken. Anasynyń ótіnіshіne kúmán keltіrmegen er adam qajettі áreketterdі oryndaǵan. Keıіn onyń atyna іrі kólemde nesıe rásіmdelgenі anyqtalǵan.

Qazіrgі tańda keltіrіlgen jalpy shyǵyn 4,6 mln teńgeden asyp otyr. Atalǵan derek boıynsha tergeý amaldary júrgіzіlýde.