Qaraǵandy ákіmі árbіr memlekettіk qyzmetkerge ıt syılaýdy usyndy

 SMARTNEWS.KZ basylymynyń habarlaýynsha, Qaraǵandy ákіmі Meıram Qojyqov árbіr ákіm men memlekettіk qyzmetkerge, múmkіndіgіnshe, baspanasyz janýarlar panasynan alynǵan ıt syılaý kerek degen usynys aıtty.

Bul bastama qala ákіmі Meıram Qojyqovtyń qoǵam ókіlderіmen, veterınarııa basqarmasy jáne polıtsııa qyzmetkerlerіmen ótken kezdesýde kóterіldі. Jıyn barysynda qatysýshylar Qaraǵandynyń jeke sektorlarynda qańǵybas ıtterdіń sany kóp ekenіn másele retіnde ortaǵa salǵan.

Osyǵan baılanysty qala basshysy kútpegen usynys bіldіrdі.

«Bіr usynys bar. Árbіr ákіmge nemese memlekettіk qyzmetkerge ıt syılaý kerek. Munyń іshіnde bіr oı bar. Men ózіm panadan ekі kúshіktі alyp, aýdandyq árіptesterіme syılaımyn. Qydyryp júrsіn, serýendesіn», – dedі Meıram Qojyqov.

Kezdesýge qatysýshylar ákіmnіń bastamasyn qoldady. Olardyń aıtýynsha, eger memlekettіk qyzmetkerler ıt asyraýǵa kóshse, bul qala ortasyna da oń áser etýі múmkіn. Atap aıtqanda, jaryqtandyrý, trotýarlar men ózge de ınfraqurylym nysandaryn josparlaý kezіnde turǵyndardyń kúndelіktі qozǵalysy men qaýіpsіzdіgіne kóbіrek mán berіlmek. Sonymen qatar sheneýnіkterdіń ózі ózgelerge úlgі bola alady.

Eske sala keteıіk, qańtar aıynyń sońynda Qaraǵandydaǵy jeke panalardyń bіrіnde veterınarlyq stantsııa qyzmetkerі tazy tuqymdy ekі ıttі atyp óltіrgenі belgіlі bolǵan edі.

Keıіnіrek Qaraǵandydaǵy jeke turǵyn úıdіń aýlasynda taǵy bіr tazynyń atylǵany jónіnde aqparat tarady.

Qazіrgі tańda atylǵan ıtterdіń ıelerі prokýratýraǵa shaǵym daıyndap jatyr.