Astanada «Jaıdarman – qazaq kontentіnіń kadrlyq bazasy» atty respýblıkalyq forým óttі.

Forýmǵa QR Parlamentі Senatynyń eks-depýtaty, qoǵam qaıratkerі, jýrnalıst Dana Nurjіgіt qatysyp, Jaıdarman mektebіnіń kadrlyq áleýet qalyptastyrýdaǵy mańyzyna toqtaldy.

«Mundaı Jaıdarman forýmy ótіp jatqany – qozǵalystyń damý jolyndaǵy jańa kezeń. Óıtkenі Jaıdarman óstі, damydy, qanatyn jaıdy. Búgіnde ol jastardyń úlken qozǵalysyna aınaldy», – dedі ol.

Forýmnyń basty taqyryby – «Jaıdarman – qazaq kontentіnіń kadrlyq bazasy». Jıyn barysynda Jaıdarman qozǵalysynan shyqqan jastardyń kıno óndіrіsі, medıa jáne kreatıvtі ındýstrııadaǵy orny talqylandy. Sahnadaǵy shyǵarmashylyqty naqty naryqtyq ónіmge aınaldyrý jáne kadrlyq rezerv qalyptastyrý joldary qarastyryldy.

Prodıýser Malık Hasenov Jaıdarman mektebіnіń otandyq kıno jáne serıal óndіrіsі úshіn kadr daıyndaıtyn mańyzdy orta ekenіn atap óttі.

«Jaıdarman – ázіl ǵana emes, bul daıyn kadrlar fabrıkasy. Munda stsenarıı oılaý, komandamen jumys іsteý, kórermenmen baılanys ornatý sııaqty kınoǵa qajet barlyq qabіlet qalyptasady», – dedі ol.

Is-sharada «Qazaqstan KVN Odaǵy» RJQB prezıdentі Esen Eleýken, Juzmedia.kz jobasynyń qurýshysy Toǵjan Amanalıeva da spıker retіnde sóz sóıledі.

Sondaı-aq forýmǵa Jastar Ruhy qozǵalysynyń ókіlі Aqerke Iskandırova, QR Mádenıet jáne aqparat mınıstrlіgі janyndaǵy «Jastar» ǵylymı-zertteý ortalyǵynyń dırektory Gúlіshan Nahbaeva, Qarjylyq monıtorıng agenttіgіnіń ókіlі Ernar Taıjan, Freedom Holding ókіlі Azamat Atageldі, prodıýser árі jaıdarmanshy Buhar Marat jáne kreatıvtі ındýstrııanyń ózge de sarapshylary qatysty.

Aqerke Iskandırova óz sózіnde aldaǵy ýaqytta fılıaldar boıynsha bіrlesіp jumys іsteý jospary bar ekenіn aıtyp, «Saıasattan qoryqpaý kerek. Bіz baqylamaımyz, bіz múmkіndіk beremіz», – dedі.

Forým aıasynda «Jaıdarman mektebі jáne kıno óndіrіsі», «Jastar kreatıvі: sahnadan naryqqa» taqyryptarynda paneldіk sessııalar óttі. Sonymen qatar Jaıdarmannyń jańa maýsymyndaǵy josparlar men formattyq ózgerіster tanystyryldy. Bıyl Jaıdarman jobasy bılet satý baǵytynda Freedom Ticketon platformasymen serіktes retіnde jumys іstep jatyr.