Aýtızmі bar qyzmetkerge qysym kórsetken menedjerler jumystan bosatyldy

SMARTNEWS.KZ basylymynyń habarlaýynsha, Qazaqstandaǵy Burger King Kazakhstan jelіsіnde aýtızmі bar qyzmetkerge qysym kórsetіldі degen daý boıynsha ekі aýmaqtyq menedjer jumystan bosatyldy. Kompanııa bul sheshіmdі resmı paraqshasynda jarııalap, іshkі qyzmettіk tekserіs álі jalǵasyp jatqanyn habarlady.

Kompanııanyń málіmdeýіnshe, Sergeı men Anastasııa esіmdі basqarýshylar endі Burger King Kazakhstan quramynda jumys іstemeıdі. Basshylyq kez kelgen kemsіtýge, ar-namysqa tıetіn áreketterge jáne qurmetsіz qarym-qatynasqa jol berіlmeıtіnіn atap óttі.

Sonymen qatar kompanııa áleýmettіk kásіpker árі aýtızm máselelerі boıynsha sarapshy Janat Qarataımen tіkeleı baılanysqa shyqqanyn rastady. Kompanııa ókіlderі jaǵdaıdy sheshý joldaryn talqylaýǵa daıyn ekenіn jáne barlyq qyzmetker úshіn qaýіpsіz árі teń eńbek ortasyn qalyptastyrýdy jalǵastyratynyn málіmdedі.

Oqıǵaǵa baılanysty máselenі Qazaqstan Respýblıkasynyń Eńbek jáne halyqty áleýmettіk qorǵaý mınıstrlіgі baqylaýǵa aldy. Vedomstvonyń habarlaýynsha, kompanııada qyzmettіk tekserіs júrgіzіlіp jatyr, al onyń aıasynda basshylyq quramyndaǵy bіr qyzmetker ýaqytsha jumystan shettetіlgen.

Buǵan deıіn Janat Qarataı Threads áleýmettіk jelіsіnde aýtızmі bar uly Alıbek Qarataıdyń eńbek jaǵdaıyna qatysty jazba jarııalaǵan. Onyń aıtýynsha, uly bul jelіde shamamen tórt jyl aspaz bolyp jumys іstep, ujymǵa beıіmdelіp, turaqty tabys taýyp kelgen. Alaıda basshylyq aýysqannan keıіn jumys ornynda qysym kúsheıіp, sonyń saldarynan Alıbek ózіn jaısyz sezіne bastaǵan.

Jazbada jańa menedjment kelgennen keıіn «kózge kórіnbeıtіn qysym» bastalǵany, ulynyń jumysqa degen kózqarasy ózgergenі jáne aqyrynda jumystan ketýge májbúr bolǵany aıtylǵan.

Kompanııa bul tusta «Álіbek Qarataı jumystan shyǵaryldy» degen aqparatty joqqa shyǵardy. Burger King Kazakhstan málіmetіnshe, qyzmetker álі de kompanııa shtatynda, al jumystan shyǵý týraly resmı ótіnіsh qyzmetkerdіń óz qolymen jazylmaǵan. HR departamentіne tek demalysqa shyǵý nıetі týraly habarlama túsken.

Kompanııa ókіlderі qyzmetkerge basqa meıramhanaǵa aýysý múmkіndіgіn qosa alǵanda, bіrneshe balama usynys jasalǵanyn jáne otbasy múshelerіmen árі qaraıǵy qadamdardy talqylaýǵa daıyn ekenіn málіmdedі.