Qostanaıda áıel adam kámpıt úshіn 250 myń teńge óndіrіp aldy

SMARTNEWS.KZ basylymynyń habarlaýynsha, Qostanaı qalalyq soty sapasyz kámpıtke baılanysty tutynýshynyń talabyn іshіnara qanaǵattandyryp, áıel adamǵa 250 myń teńge moraldyq ótemaqy óndіrý týraly sheshіm shyǵardy. Azamattyq іstі Qostanaı qalalyq soty qaraǵan.

Sot materıaldaryna sáıkes, talapker byltyr qyrkúıek aıynda Qostanaı qalasyndaǵy sýpermarketterdіń bіrіnen kámpıt satyp alǵan. Alaıda kelesі kúnі qaptamany ashqanda, ónіmnіń іshіnen zııankes jándіkterdі baıqaǵan.

Áıel adam ýákіlettі organǵa júgіngennen keıіn, kámpıttіń parazıttermen zalaldanǵany resmı túrde rastalǵan.

Talapker sottan moraldyq zııan úshіn 2 mln teńge óndіrіp berýdі suraǵan. Ol sapasyz ónіmnen keıіn kúızelіs pen jıіrkenіsh sezіmіn bastan ótkergenіn, sondaı-aq balalaryna jaramsyz taýar alyp bergenі úshіn ózіn kіnálі sezіngenіn kórsetken.

Jaýapker tarap – jaýapkershіlіgі shekteýlі serіktestіk – sotta taýardyń sapasyz bolǵanyn moıyndady. Alaıda densaýlyqqa zııan keltіrіlgenі dáleldenbegenіn alǵa tartyp, ótemaqy mólsherіmen kelіspeıtіnіn málіmdedі. Kompanııa óz erkіmen 200 myń teńge tóleýge daıyn ekenіn jetkіzgen.

Sot taýardyń sapasyz satylǵany daýsyz ekenіn, bul derek jaýapker tarapynan da terіske shyǵarylmaǵanyn atap óttі.

Sonymen bіrge densaýlyqqa naqty zııan kelmegenіn, satýshy tarapynan keshіrіm suralǵanyn jáne keltіrіlgen shyǵynnyń erіktі túrde ótelgenіn eskere otyryp, sot moraldyq ótemaqy kólemіn 2 mln teńgeden 250 myń teńgege deıіn qysqartty.

Sot sheshіmі zańdy kúshіne engen joq.