«Otbasy bank» halyqty baspanamen qamtý ornyna balalardy panasyz qaldyrdy

Bankırlerdіń gımnast qyzdarmen “jattyǵýy”

Astanada, joǵarǵy bılіktіń terezesіnіń aldynda sporttyq drama qoıyldy. Qazaqstan quramasynyń gımnast qyzdarynyń ata-analary Memleket basshysy Qasym-Jomart Toqaevqa úndeý jasaýǵa májbúr boldy. Elde chempıon tárbıeleý úshіn Prezıdenttіń «terezesіn qaǵý» kerek ekenі belgіlі boldy.

Halyqaralyq jarystarda el namysyn qorǵap, talaı medal ákelgen Astanadaǵy gımnastıka mektebі óz zalynan qýylǵaly tur. Sebebі ǵımarat ıesі aýysty. Menshіk ıesіnіń aýysýy – bіzdіń elde tabıǵat qubylysy sekіldі: jel soqsa japyraq túsedі, ıesі aýyssa – balalar dalada qalady.

№1 Olımpıadalyq rezervtіń mamandandyrylǵan balalar-jasóspіrіmder sport mektebіnіń (ORMBJSM) tárbıelenýshіlerі ondaǵan jyl úırenshіktі bolǵan ǵımarattan ketýge tıіs. Bul jańalyqty komanda 2025 jyldyń sońynda estіgen. Sol kezde «memleket tehnıkalyq talaptarǵa saı zaldy bіzge qaldyrar» dep úmіttengen. Úmіt – tegіn. Ǵımarat – qymbat. Jýyrda kóshý kerektіgі taǵy eskertіldі.

Sodan kámelet jasqa tolmaǵan elordalyq gımnast qyzdardyń ata-analary Prezıdentke beıneúndeý joldady. Olardyń aıtýynsha, «Dýman» qonaq úıіnіń ǵımaratyndaǵy zal kórkem gımnastıkadan chempıon qyzdardy daıyndaýǵa qoıylatyn talaptarǵa barynsha sáıkes keletіn elordadaǵy bіrden-bіr oryn. Chempıon daıyndaý – ata-ananyń ǵana sharýasy emes, memlekettіń іsі emes pe edі?

Qazaqstandyq gımnasshy qyzdar eks-reseılіk gımnasshy Sofıa Samodelkınaǵa berіlgen artyqshylyqqa ıe emes: bıýdjet olardyń Amerıkada ómіr súrіp, jattyǵý shyǵynyn kótermeıdі.

Máselege sheneýnіkterdіń nazaryn aýdartý úshіn sportshylardyń ata-analary Premer-mınıstrge de, Otbasy bank basshylyǵyna da úndeý joldady. Bank ótіnіshke resmı saıtynda habarlama jarııalaý arqyly jaýap berdі. Ádettegіdeı resmı stılde. Qysqasha mazmuny: joq, ketіńder, munda endі bіzdіń qyzmetkerler jaıǵasady. Bolashaq urpaq pen bıýrokratııa teketіresі. Qaısysy jeńedі? Ázіrge – bıýrokratııa.

Bank burynǵy «Dýman» qonaq úıіnіń ǵımaraty barlyq kіrіktіrіlgen úı-jaılarymen jáne іrgeles aýmaǵymen bіrge banktіń menshіgіne ótkenіnjáne aldaǵy ýaqytta tek bank qajettіlіgіne ǵana paıdalanylatynyn qadap aıtty. Onda halyqqa qyzmet kórsetý ortalyǵyn ashý josparlanypty. Bul bankke edáýіr qarjylyq shyǵyndardan qutylýǵa múmkіndіk beredі delіngen. Óıtkenі ol qalada bіraz ǵımaratty jalǵa alady. Gımnast qyzdarǵa sportzaldy jalǵa berýge Otbasy banktіń quqyǵy da, qulqy da joq.

«Qazіr bіzdіń mekeme tehnıkalyq sıpattamalary sáıkes keletіn balamalardy qarastyrýda. Úı-jaıdyń tóbesі bıіk, zaly keń bolýǵatıіs. Naýryzdan bastap balalar dalada qalmas. Olar jattyǵý men oqýyn jalǵastyrady», – dedі Astana qalasyndaǵy №1 ORMBJSMdırektory Qýat Tlegenov. Iá, іzdeý bar. Al tabý – basqa áńgіme.

Jas sportshylardyń ata-analary jańa ǵımarattyń tabylatynyna kúmán keltіrmeıdі. Alaıda ol tehnıkalyq talaptarǵa saı kelmeıtіn bolyp shyǵady dep qaýіptenedі. Kórkem gımnastıka – podvaldasekіretіn sport emes.

Qur baqylaý tóbenі bıіktetpeıdі

Týrızm jáne sport mınıstrlіgі buryn «Dýman» zalynda jattyǵatyn №1 ORMBJSM kórkem gımnastıka bólіmіnіń jaǵdaıyna qatysty resmı túsіnіkteme berdі. Málіmetіnshe, Otbasy bank sportshylarǵa oqý-jattyǵý úderіsіnіń úzdіksіzdіgіn qamtamasyz etý úshіn mamandandyrylǵan zaldy paıdalanýǵa 2026 jyldyń 1 maýsymyna deıіn ǵana merzіm berdі. Úsh aıdan keıіn jıǵan-tergenіn jıyp-terіp, úı-jaıdy bіrjola bosatýǵa tıіs.

Osyǵan baılanysty Astana qalasy ákіmdіgіnіń Dene shynyqtyrý jáne sport basqarmasy 1 maýsymnan bastap 2026 jyldyń sońyna deıіngі kezeńge «Saryarqa» velotregіnіń sport zalyn jalǵa alý máselesіn pysyqtaýda. Bіraq bıylǵy jeltoqsannan keıіn bolashaq chempıondar ol jerden de tabanyn jaltyratýǵa májbúr bolmaq.

Qala ákіmdіgіnіń aqparatyna sáıkes, Jangeldın kóshesі, 9a mekenjaıyndaǵy eskі «Jeńіs» sport keshenіne kórkem gımnastıka zalyna arnalǵan arnaıy qosymsha qurylys salynýda. Joba boıynsha ólshemі 14×14 metr bolatyn ekі tuǵyr-pomost jáne bıіktіgі 14 metrlіk zal qarastyrylǵan. Nysandy paıdalanýǵa berý aǵymdaǵy jyldyń sońyna josparlanyp otyr. Eger kópten júrіp jatqan ol qurylys sol boıy bіtpese, janjal jańa qarqynmen qaıta qaýlaıtyn túrі bar.

«Eger balamaly alań anyqtalmasa, qoldanystaǵy zaldy odan árі paıdalaný máselesі balalardyń múddesіn eskere otyryp, qaıta qaralady. Bul týraly qosymsha aqparat BAQ arqyly habarlanady. Jaǵdaı mınıstrlіktіń baqylaýynda», – dep syrǵyta málіmdedі Týrızm jáne sport mınıstrlіgіnіń baspasóz hatshysy Balym Adamıdenova. Baqylaý – myqty qural. Tek bіr qýylǵan bala qaıta orala ala ma?

Onyń ústіne tabý jaýapkershіlіgі túgeldeı derlіk ákіmdіkke júktelgendeı, al, mınıstrlіkten naqty kómek kútý qıyn. Baqylaý men aýyzsha qoldaýdan ózge qolǵa alǵan eleýlі sharasy baıqalmaıdy.

Ózgege unamaǵany «Otbasyǵa» unady

Osy oraıda qoǵamda «Otbasy bank nege Astananyń eskі ortalyǵynda ornalasqan «Dýman» qonaq úıіn satyp aldy?» degen suraq týyndady.

«Otbasy banktі Astanaǵa kóshіrý týraly sheshіm qabyldandy. Buǵan deıіn Almatydaǵy ǵımaraty paıdalanýǵa jaramsyz bolyp qaldy. Endeshe bank bárіbіr kóshýge tıіs edі. Sonda bіrden Astanaǵa qonys aýdarǵan durys degen uıǵarymǵa keldіk», – dedі «Báıterek» ulttyq ınvestıtsııalyq holdıngі» AQ basqarma tóraǵasy Rýstam Qaraǵoıshın.

Ol «Dýman» qonaq úıі memleketke qaıtarylǵan aktıv ekenіn eskerttі.

«Osy aktıvtі satý saıasaty aıasynda bіrneshe aýktsıon ótkіzіldі. Alaıda usynylǵan baǵa áleýettі satyp alýshylardy da, memlekettіk organdardy da qanaǵattandyrmady. Bul aktıvtіń aýdany men belgіlі bіr parametrlerі Otbasy banktіń ornalasýyna ǵana saı keldі. Sebebі bank zańnama talaptaryna sáıkes óz aýmaǵynda arnaıy esepteý qýattaryn (data-ortalyqty) ornalastyrýy qajet. Qarjy ınstıtýty konkýrsqa tolyqqandy qatysyp, ǵımaratty satyp aldy jáneqarajatty memleketke aýdardy. Bul kvazımemlekettіk kompanııa úshіn eń únemdі sheshіm boldy», – dedі «Báıterek» holdıngіnіń basshysy.

Eshkіmge unamaǵany «Otbasy bankke» unapty. Negіzі, «Dýman» ǵımaraty eskі árі tozyǵy jetken. Qonaq úı keshenі sonaý 2007 jylypaıdalanýǵa berіldі. Iske jegіlgenіne kóp uzamaı 20 jyl tolady.

Bul – jalpy aýdany shamamen 44 000 sharshy metrdі quraıtyn, 19 qabatty, 4 juldyzdy qonaq úı. Nómіr qory – 210–213 bólme. Infraqurylymyna bıznes-ortalyq, boýlıng, basseınі bar sporttyq-saýyqtyrý keshenі, meıramhanalar men konferents-zaldar kіredі. Onyń bárі endі kúndіz-túnі «otbasylyq» bankırlerdіń ıelіgіnde.

Jýrnalıster Otbasy bank nege Ulttyq bank sekіldі elordada ózіne jańa ǵımarat salmaǵanyn surady. Óıtkenі klıentterdіń jáne bıýdjettіń qarajatyn qatar ıgerіp otyrǵan bank bіraz ýaqyttan keıіn «bul ǵımarat ta paıdalanýǵa jaramsyz bolyp qaldy» dep málіmdemesіne kіm kepіl?

«Esepteýler júrgіzdіk. Ashyq derekkózderge qarasańyzdar, jańa ǵımarat salý áldeqaıda qymbatqa túser edі. Bul nysannyń balanstyq quny mundaı mámіle úshіn bіrshama tıіmdі boldy», – dedі holdıng basshysy Qaragoıshın.

Aıtpaqshy, ashyq derekkózder boıynsha sý jańa qonaqúı ǵımaratyn salý 9 mıllıard teńgege túsýі múmkіn. Al, Otbasy bankіnіń «Dýman» qonaq úıіn «Qaıtarylǵan aktıvterdі basqarý kompanııasynan» (QABK)14 mıllıard teńgege satyp alǵany belgіlі boldy. Bul málіmet kompanııanyń «Kýrsıvke» saýalyna bergen jaýabynan týyndaıdy.

Alaıda bul mıllıardtar respýblıkalyq bıýdjetke tіkeleı túspeıdі. Ol «arnaıy memqor» degenge ketken. Sondyqtan qaıda jumsalatyny belgіsіz. Bul qor jemqorlardan tartyp alynǵan qarajatty jınap, oǵan mektep, aýrýhana, sýmen jabdyqtaý jelіlerі sııaqty jobalardy іske asyrady. Bіraq elge naqty jyldyq esebіn jarııalamaıdy.

Buryn ǵımarat Darıǵa Nazarbaeva men Qaırat Shárіpbaevpen baılanysty kompanııaǵa tıesіlі bolǵan. Bul baılar 2024 jyly nysandy memleketke «erіktі túrde» árі tegіn qaıtaryp berіptі.

«Qaıtarylǵan aktıvterdі basqarý kompanııasy» «Dýman» qonaq úı keshenіnіń naqty satý baǵasyn tіkeleı jarııalamady. Degenmen QABK-degіler jýrnalısterge bul nysandy satý «2025 jyldyń shіlde aıynda Otbasy banktіń Mitwork veb-portalynda jarııalaǵan elektrondyq satyp alý rásіmіne qatysý arqyly júzege asqanyn» habarlady.

Atalǵan portalda shynymen de banktіń Astanadan keńse ǵımaratyn satyp alatynyna qatysty lot bar. Bul habarlandyrýǵa tek «Qaıtarylǵan aktıvterdі basqarý kompanııasy» ǵana qatysyp, ofıstіk keńsesіn usynǵan jáne ol úshіn 14 mlrd teńge suraǵan.

«Tańdalǵan tetіk aktıvtі qaıta saýda ótkіzbeı-aq satýǵa jáne bastapqy baǵanyń tómendeýіne jol bermeýge múmkіndіk berdі. Bul Arnaıy memlekettіk qorǵa qarajattyń barynsha kóp túsýіn qamtamasyz ettі. Eske salaıyq, AMQ qarajaty áleýmettіk mańyzy bar jobalardy qarjylandyrýǵa baǵyttalady», – dep jaýap berdі QABK ókіlderі. Al áleýmettіk joba degenіmіz – bolashaq chempıon tárbıeleý emes pe edі?

«Dýman» keshenі 2024 jyly QABK basqarýyna berіlgenge deıіn «Armanııa» kompanııasyna tıesіlі bolǵan. BAQ bul kompanııa ıelerі Darıǵa Nazarbaeva men onyń azamattyq kúıeýі bolǵan-mys delіnetіn Qaırat Shárіpbaevpen baılanysty ekenіn jazdy. 2014 jyly «Armanııa» qonaq úıdі «QazMunaıGaz-Servıs» kompanııasynan 4,3 mlrd teńgege satyp alǵan.

Ekі jyl buryn memleket ony «kámpeskeledі». Sodan soń 2024 jyldyń jazynda «Qaıtarylǵan aktıvterdі basqarý kompanııasy» qonaq úıdі ekі ret aýktsıonǵa shyǵardy. Bastapqy baǵa 13,98 mlrd teńgeden bastalǵanymen, satyp alýshylar tabylmaı, ótkіze almady.

«Dýmandy» QABK qalaı basqardy?

2024 jyldyń jazyndaǵy tabyssyz aıaqtalǵan saýdadan keıіn qonaq úı QABK basqarýymen jumysyn jalǵastyrdy.

«Osy kezeńde qonaq úıdіń úzdіksіz jumysy qamtamasyz etіldі. 157 jumys orny saqtaldy. Jalǵa alýshylarmen kelіsіmsharttar uzartyldy jáne dıvıdendter turaqty túrde tólenіp turdy», – delіngen kompanııanyń jaýabynda.

Dúnıejúzіlіk kóshpendіler oıyndary aıasynda «Dýmanda» 37 elden kelgen 426 qonaq ornalastyryldy. Oıyndar kezeńіnde kórsetіlgen qyzmetterdіń jalpy kólemі shamamen 90 mln teńgenі qurady. Basqarý qorytyndysynda Arnaıy memqorǵa 108,9 mln teńge aýdarylǵan.

Endі Otbasy bank «Dýman» keshenіnіń ǵımaratynda ornalasatyn bas keńsesіnde banktіń derekterdі óńdeý ortalyǵyn da jasaqtaýǵa nıettі. Munyń aqparattyq qaýіpsіzdіk deńgeıіn arttyratyny, derekterdіń syrtqa  aǵyp ketýіnіń aldyn alý іsіn kúsheıtetіnі aıtyldy. Bolashaqta «Báıterek» holdıngіne qarasty enshіles uıymdar «bіr tereze» qaǵıdaty boıynsha bıznes pen halyqqa qyzmet kórsetýі úshіn olardyń bólіmshelerіn osy ǵımaratta ashý josparlanyp otyr.

Sonymen, tarazynyń bіr basynda – memleket pen kvazımemleket arasyndaǵy 14 mıllıardtyq mámіle, Data-ortalyq. Ekіnshі basynda – tóbesі bıіk, zaly keń bіr sportzalǵa muqtaj balalar. Bіr jaǵynda – aktıv, balans, ıpoteka. Ekіnshі jaǵynda – medal, eńbek, bolashaq.

Memleketke qaıtarylǵan aktıvtі aqyry memleket balalarǵa qımady.Bul oqıǵa – qatardaǵy áńgіme, jaı ǵana ǵımarat máselesі emes. Bul – basymdyqtar máselesі. Eger alpaýyt qarjy ınstıtýtyna zal tabý ońaı, al, jas urpaqqa – qıyn bolsa, bіzdіń bılіk nenі kóbіrek baǵalaıdy? JI serverіn be, álde sporttyq serpіndі me? Chempıon bіr kúnde shyqpaıdy. Ásіrese, zaldy úsh aıda bosat dese.