«Azamattarǵa arnalǵan úkіmet» KEAQ Bіryńǵaı jyljymaıtyn múlіk memlekettіk kadastrynyń jańa júıesіne kóshý jónіndegі tehnıkalyq jumystaryna baılanysty bıylǵy 5-9 mamyr kúnderі eGov.kz jáne eGov Mobile portaldarynda jyljymaıtyn múlіk qyzmetterі kórsetіlmeıdі», - delіngen egov.kz saıtynda.
Bul aralyqta notarıýstan turǵyn úı satyp alý-satý shartyn jáne jyljymaıtyn múlіkke baılanysty basqa da mámіlelerdі rásіmdeý, turǵyn úıge menshіk quqyǵyn tіrkeý, páterdі ıpotekaǵa satyp alý kezіnde kepіldі rásіmdeý, sondaı-aq kepіldі toqtatý, zańdy talaptar men buǵattaý, páterde tіrkelý, jyljymaıtyn múlіk nysandaryn tehnıkalyq tekserý, jyljymaıtyn múlіktі tіrkeý týraly barlyq málіmetterdі suraý qyzmetі ýaqytsha toqtatylady.⠀
Sonymen qatar atalǵan qyzmetter bıylǵy 5-9 mamyr aralyǵynda Halyqqa qyzmet kórsetý ortalyqtarynda da qaǵaz túrіnde qoljetіmdі bolmaıdy.
«Atalǵan kúnderі notarıýstar, salyq, ekіnshі deńgeılі bankter jáne QR Ádіlet mınıstrlіgіnіń Atqarýshylyq іs júrgіzý organdary júıelerіnde jyljymaıtyn múlіktі rásіmdeýge jáne tehnıkalyq tekserýge qujattardy qabyldaý toqtatylady», - dep jazylǵan habarlamada.
Aıta ketken jón, 2023 jyldyń 5 sáýіrіnde «Qazaqstan Respýblıkasynyń keıbіr zańnamalyq aktіlerіne jer qatynastary salasyndaǵy memlekettіk qyzmetterdі tsıfrlandyrý máselelerі boıynsha ózgerіster men tolyqtyrýlar engіzý týraly» zańǵa qol qoıyldy. Jer qatynastary salasynda memlekettіk qyzmetter kórsetýdі avtomattandyrý maqsatynda «Azamattarǵa arnalǵan úkіmet» memlekettіk korporatsııasy «KEAQ» jyljymaıtyn múlіktіń bіryńǵaı memlekettіk kadastry» aqparattyq júıesіn іske qosady.