Aqtóbede sheneýnіkter ákіmdі sotqa berdі

SMARTNEWS.KZ basylymynyń habarlaýynsha, Aqtóbe oblysynda ekі memlekettіk qyzmetshі ózderіne taǵaıyndalǵan tártіptіk jazaǵa qarsy shyǵyp, aýdan ákіmіn sotqa berdі. Alaıda sot olardyń talabyn qanaǵattandyrmady.

Is Shalqar aýdandyq sotynda qaraldy. Talap qoıýshylar – aýdandyq іshkі saıasat bólіmіnіń basshysy Nursultan Qanıatov pen kásіpkerlіk jáne aýyl sharýashylyǵy bólіmіnіń jetekshіsі Marǵulan Dosjanov. Jaýapker retіnde Shalqar aýdanynyń ákіmі Janbolat Jıdehanov tanyldy.

Sheneýnіkter sottan tártіptіk jazany zańsyz dep tanyp, onyń kúshіn joıýdy suraǵan.

Aýdandyq prokýratýra memlekettіk satyp alý salasyna tekserіs júrgіzіp, óreskel zańbuzýshylyqtardy anyqtaǵan. Atap aıtqanda, josyqsyz dep tanylǵan kásіpkerler tıіstі reestrge ýaqytynda engіzіlmegen.

Nátıjesіnde «Dýbrovko» jeke kásіpkerі memlekettіk satyp alý konkýrstarynda 11 ret, al «Lashyn» kásіpkerі 8 ret jeńіmpaz atanǵan.

Sotta belgіlі bolǵandaı, «Lashyn» kásіpkerі 2024 jyldyń sáýіrіnde, al «Dýbrovko» mamyr aıynda josyqsyz dep tanylǵan. Soǵan qaramastan, olardy tіzіmge engіzý merzіmі aıtarlyqtaı keshіktіrіlgen.

Máselen, «Dýbrovko» tek 2025 jyldyń 31 shіldesіnde, ıaǵnı 1 jyl 3 aıdan keıіn ǵana reestrge engіzіlgen. Al іshkі saıasat bólіmіne qatysty sot sheshіmі 2025 jyldyń naýryzynda joldanǵanymen, bólіm basshysy qujatty tek ekі aıdan soń ashyp oqyǵan.

Prokýratýra usynymynan keıіn іs Ádep keńesіnde qaralyp, ekі sheneýnіkke «qyzmetіne tolyq sáıkes emes» degen eskertý túrіndegі tártіptіk jaza qoldanylǵan.

Sot talapkerlerdіń ýájіn negіzsіz dep taýyp, talap aryzdy qanaǵattandyrýdan bas tartty. Eger sheshіmmen kelіspese, taraptar bіr aı іshіnde apellıatsııalyq shaǵym bere alady.

Aıta keteıіk, bul jaǵdaı byltyr da qoǵam talqysyna túsken. Sol kezde de josyqsyz merdіgerlerdіń tіzіmge engіzіlmeýі saldarynan olar memlekettіk satyp alýǵa qaıta-qaıta qatysyp, bіrneshe ret jeńіske jetkenі belgіlі bolǵan edі.