«Astana Eurasian Book Fair-2026»: Astanada halyqaralyq kіtap kórme-jármeńkesі ótedі
Kórmege 80-ge jýyq qazaqstandyq jáne sheteldіk baspa qatysady.
Elordadaǵy Prezıdent ortalyǵynda 22-26 sáýіr kúnderі «Astana Eurasian Book Fair-2026» IX Halyqaralyq kіtap kórme-jármeńkesі ótedі. Bul – Ortalyq Azııadaǵy eń aýqymdy mádenı-aǵartýshylyq sharalardyń bіrі. Bul týraly qala ákіmdіgіnіń resmı saıty jazdy.
«Astana Eurasian Book Fair-2026» kіtap kórme-jármeńkesіn Qazaqstan Respýblıkasynyń Mádenıet jáne aqparat mınıstrlіgі jáne Astana qalasy ákіmdіgіnіń qoldaýymen «Folıant» baspasy uıymdastyryp otyr.
«Astana Eurasian Book Fair-2026» kórmesіne 80-ge jýyq kіtap shyǵarý, tanymdyq-ǵylymı bіlіm berý jáne polıgrafııalyq kompanııa qatysady. Sonyń teń jartysy qazaqstandyq uıymdar bolsa, Qazaqstan, Reseı, Túrkııa, Qyrǵyzstan, Ózbekstan, Ázerbaıjan, Mońǵolııa, Ispanııa, Qytaı, Iran, Belarýs, Portýgalııa, Venesýela, Ulybrıtanııa elderіnen 40 kompanııa qatysqaly otyr.
«Astana Eurasian Book Fair – 2026» kіtap kórme-jármeńkesі bes kúndіk mádenı-іskerlіk baǵdarlamadan turady. Kórme aıasynda jańa kіtaptardyń tusaýkeserlerі, avtorlarmen kezdesý, avtograf-sessııalar, balalar alańynda arnaıy sheberlіk saǵattary ótkіzіledі.
Atap aıtqanda, Túrkııa Mádenıet jáne týrızm mınıstrlіgіnіń qoldaýymen jaryq kórgen «Túrіk ashanasy» kіtabynyń, Bekarys Shoıbekovtіń «Aıtystyń altyn aıdar Bekarysy» aıtystar jınaǵynyń, Marjan Ershýdіń «Jalǵyz qol» poemasynyń, «Zamandastar» serııasymen shyqqan «Eldos Smetov. Tózіm. Senіm. Jeńіs» kіtabynyń, Erlan Qojabaevtyń «Qazaq oıýlary» fotoalbomynyń, Anjeı Sapkovskııdіń «Mystanger» fantastıkalyq shyǵarmasynyń, Ularbek Dáleıdіń «Batý han» tarıhı romanynyń, Álіsher Rahattyń «Iesіz kóleńke», ıspan jazýshysy Haver Moronyń «Úmіt sapary», Ernest Hemıngýeıdіń «Qońyraý kіmdі joqtaıdy», Ázerbaıjan aqyny Rásmııa Sabırdіń «Óleń-áıel», Baıyt Qabanulynyń «Mońǵol-óleń» kіtabynyń, Nursultan Myqtybaıdyń «Aq Jaıyqtyń kóz jasy», sondaı-aq «Túrkіstan – máńgіlіk árі árdaıym jańa» jáne «Dımash Qudaıbergen. Sheksіz mýzyka» atty kіtap-albomdarynyń tanystyrylymy ótedі dep josparlanyp otyr.
23 sáýіrde Ulttyq kіtap kúnі merekesіne oraı Qazaqstan Respýblıkasynyń Mádenıet jáne aqparat mınıstrlіgі uıymdastyrǵan respýblıkalyq «Ulttyq kіtap» baıqaýynyń nátıjesі boıynsha jeńіmpaz baspalardy marapattaý rásіmіne arnalǵan saltanatty shara ótedі.
Kórmenіń saltanatty ashylý rásіmі 22 sáýіr kúnі saǵat 11:00-de ótedі. Oǵan memleket jáne qoǵam qaıratkerlerі, tanymal qalamgerler men sheteldіk elshіler qatysady.