Almatyda dárіgerler 12 jastaǵy qyzdyń asqazanynan úshіnshі ret shash túıіnіn aldy

SMARTNEWS.KZ basylymynyń habarlaýynsha, Almatyda dárіgerler 12 jastaǵy qyzdyń asqazanynan іrі kólemdegі shash túıіnіn alyp tastady. Erekshe jaǵdaı – bul naýqasqa dál osyndaı operatsııa úshіnshі ret jasalyp otyr.

Almaty qalalyq №2 balalar klınıkalyq aýrýhanasynyń málіmetіnshe, patsıent jedel túrde aýrýhanaǵa jetkіzіlіp, oǵan sırek kezdesetіn árі asa kúrdelі dıagnoz – trıhobezoar, ıaǵnı asqazanda jınalǵan úlken shash konglomeraty anyqtalǵan.

Aýrýhana dırektory Marat Rabandııarovtyń aıtýynsha, keshendі tekserýler, sonyń іshіnde endoskopııa nátıjesіnde dárіgerler balanyń ómіrіne tіkeleı qaýіp tóndіrgen іrі túzіlіstі anyqtap, shuǵyl ota jasaýǵa sheshіm qabyldaǵan.

Jaǵdaıdyń kúrdelіlіgі – bul qyz buǵan deıіn dál osyndaı dıagnozben ekі ret operatsııa ótkergen. Alǵashqy ota 2021 jyly Shymkentte, ekіnshіsі 2024 jyly Semeıde jasalǵan. Qaıtalanǵan hırýrgııalyq aralasýlar іsh qýysynda aıqyn jabysqaq protsesterdіń paıda bolýyna, tyrtyqtardyń qalyptasýyna jáne asqazan qabyrǵasynyń ózgerýіne ákelgen.

Aýrýhananyń hırýrgııa bólіmіnіń meńgerýshіsі Marat Qaptaǵaevtyń sózіnshe, bul jaǵdaı ota júrgіzýdі aıtarlyqtaı qıyndatqan. Aıqyn jabysqaqtar, tіnderdіń tyrtyqtyq ózgerіsterі jáne anatomııalyq deformatsııalar operatsııa barysynda kúrdelі tehnıkalyq kedergіler týǵyzǵan.

Soǵan qaramastan, dárіgerler joǵary kásіbı deńgeıde kúrdelі operatsııany sáttі ótkіzdі. Ota kezіnde asqynýlar tіrkelmegen.

Dárіgerlerdіń málіmetіnshe, alynǵan shash túıіnі asqazannyń pіshіnіn tolyq qaıtalap, on ekі elі іshekke deıіn sozylǵan.

Qazіrgі ýaqytta qyzdyń jaǵdaıy turaqty dep baǵalanýda. Ol dárіgerlerdіń turaqty baqylaýynda jáne qajettі em qabyldap jatyr.

Mamandardyń aıtýynsha, bul derttіń sebebі – trıhofagııa, ıaǵnı shashty julý jáne ony jeýge baılanysty psıhologııalyq aýytqý. Aýrýhanada jatqan kezіnde naýqaspen psıholog jumys іstegen. Dárіgerler ony jazylǵannan keıіn psıhıatr baqylaýynda ustaýdy usynbaq, sebebі aýrýdyń qaıta qaıtalaný qaýpі joǵary.