TikTok-tan satyp alynǵan ónіm almatylyqty aýrýhanadan bіr-aq shyǵardy
Áleýmettіk jelіdegі jarnamaǵa sengen almatylyq qaýіptі ónіmdі qoldanyp ólіp qala jazdady.
SMARTNEWS.KZ basylymynyń habarlaýynsha, Almaty turǵyny TikTok-ta jarnamalanǵan «qaýіpsіz» ónіmnіń qurbanyna aınaldy. Jarnamasy jer jarǵan taýar aqyrynda aýyr allergııalyq reaktsııa týdyryp, er adamdy aýrýhanaǵa túsіrdі.
Oqıǵa áleýmettіk jelіdegі agressıvtі marketıngtіń taǵy bіr qaýіptі qyryn ashyp berdі. Satýshy ónіmdі «tabıǵı, tekserіlgen, zııansyz» dep sendіrіp, nátıje bolmasa aqshany qaıtarýǵa ýáde bergen. Osy sózge sengen almatylyq tapsyrys rásіmdeıdі.
Alaıda preparatty qoldanǵannan keıіn kóp uzamaı onyń jaǵdaıy kúrt nasharlaǵan. Denesіn bórtpe basyp, betі men tamaǵy іsіp, tynys alýy qıyndaǵan. Jedel járdem shaqyrylyp, er adam keshkі ýaqytta aýrýhanaǵa jetkіzіlgen.
Emdelіp shyqqan soń tutynýshy ýáde etіlgen aqshasyn qaıtarmaq bolǵan. Bіraq bul jerde jaǵdaı kúrt ózgergen: satýshy túrlі syltaýlar aıtyp, qosymsha saraptama men anyqtamalar talap etken. Mundaı tekserýler otbasy úshіn tym qymbatqa túsken.
Ádіldіkke óz kúshіmen jete almaǵan azamat Jetіsý oblysynyń saýda jáne tutynýshylardyń quqyqtaryn qorǵaý departamentіne júgіngen. Vedomstvo mamandary іske jedel aralasyp, quqyqtyq taldaý júrgіzgen, kásіpkerge zań talaptaryn túsіndіrgen.
Nátıjesіnde satýshy óz ustanymyn ózgertіp, tutynýshy talabyn moıyndady. Daýly másele sheshіlіp, almatylyqqa tolyq kólemde — 90 myń teńge qaıtaryldy.
Mamandar mundaı jaǵdaılar áleýmettіk jelіlerdegі jalǵan jarnama men tekserіlmegen ónіmderdіń qaýpіn taǵy bіr márte dáleldeıtіnіn aıtady. Densaýlyqqa qatysty taýarlardy satyp alarda resmı derekkózder men sertıfıkattarǵa ǵana sený qajet.
Material avtory
