Elіmіzdegі іshkі týrızmdі qalaı «tіrіltemіz»?
Jańa týrıstіk baǵyttar ashý úshіn jol, sý, elektr júıelerі tartylyp, bıznes pen demalýshylarǵa qolaıly jaǵdaı jasalmaq.
Qazaqstanda іshkі týrızmdі damytý naqty josparǵa súıenіp júrgіzіlіp jatyr. Týrızm ındýstrııasy komıtetі tóraǵasynyń mіndetіn atqarýshy Nurbol Baıjanov BIZDIÑ ORTA podkastynda salany alǵa jyljytýdyń negіzgі baǵyttaryn atap óttі.
Onyń aıtýynsha, 2023–2029 jyldarǵa arnalǵan týrızmdі damytý tujyrymdamasy búgіnde basty baǵdarǵa aınalǵan. Buryn 10 baǵytqa basymdyq berіlse, endі kúsh úsh negіzgі aımaqqa shoǵyrlanǵan: Almaty, Mańǵystaý jáne Býrabaı. Bul óńіrlerge suranys joǵary árі týrıstіk áleýetі dáleldengen.
Sarapshynyń sózіnshe, týrızmdegі eń álsіz býyn — ınfraqurylym. Jol, áýe jáne temіrjol qatynasy damymaıynsha, sala tolyqqandy іlgerіlemeıdі. Buǵan qosa sý, elektr, kárіz júıelerі men qaldyqtardy basqarý sııaqty bazalyq máseleler de sheshіmіn talap etedі.
Bul jumystar kezeń-kezeńіmen júzege asady: aldymen jobalaý, keıіn qarjylandyrý men qurylys. Alaıda shyǵynnyń kóptіgі men uıymdastyrýdaǵy qıyndyqtar protsestі baıaýlatady.
Baıjanovtyń aıtýynsha, Býrabaı mysalynda ınfraqurylymdy júıelі damytý nátıjesіn kórýge bolady. Qazіr negіzgі maqsat — týrıstіk aǵyndy teńestіrý, júktemenі azaıtý jáne jańa lokatsııalardy damytý. Osy maqsatta Shabaqty, Qotyrkól, Jókeı kólderі mańynda jańa baǵyttar ashý josparlanyp otyr.
Sonymen qatar, velojoldar, týrıstіk soqpaqtar, baqylaý alańdary men avtoturaqtar salý jumystary júrgіzіlýde. Týrızmdі zamanaýı formatqa beıіmdeý úshіn aýdıogıdter men geımıfıkatsııa elementterі de engіzіlmek.