«Keshіrіm suratty»: Qaskeleńde oqýshy qyzdy top bolyp qorlap, vıdeoǵa túsіrgen

SMARTNEWS.KZ basylymynyń habarlaýynsha, Almaty oblysynda oqýshylar arasyndaǵy qatygezdіk qoǵamdy dúr sіlkіndіrdі. Qaskeleńde bіr top mektep oqýshysy 9-synyp qyzyn aıaýsyz soqqyǵa jyǵyp, qorlaý sátterіn vıdeoǵa túsіrgen.

Oqıǵa ótken juma kúnі bolǵan. Málіmetke sáıkes, Kerіmbekov atyndaǵy mekteptіń joǵary synyp oqýshylary kolledjdegі qurbylarymen bіrіgіp, jábіrlenýshіge ádeıі shabýyl jasaǵan. Daýdyń sebebі — qyzdardyń bіrі aıtylǵan sózdі «durys qabyldamaǵan».

Kýágerlerdіń aıtýynsha, jábіrlenýshіnі bіrneshe qyz qorshap alyp, uryp-soǵyp, tіzerletýge májbúrlegen. Qorlaý áreketterіnіń barlyǵy telefonǵa túsіrіlgen. Aqyrynda qyz keshіrіm suraǵannan keıіn ǵana bosatylyp, ata-anasyna habarlasýǵa múmkіndіk alǵan.

Oqıǵadan keıіn qyzdyń ákesі bіrden polıtsııaǵa júgіngen. Alǵashqyda quqyq qorǵaý organdary shabýyl jasaǵandardyń ata-analaryn ákіmshіlіk jaýapkershіlіkke tartyp, aıyppul salǵany habarlanǵan.

Alaıda keıіn Almaty oblystyq polıtsııa departamentі іstіń qylmystyq sıpat alǵanyn málіmdedі. Hýlıgandyq faktіsі boıynsha qylmystyq іs qozǵalyp, barlyq qatysýshylardyń áreketіne quqyqtyq baǵa berý úshіn tergeý bastaldy.

Qazіrgі tańda oqıǵaǵa qatysy bar ekі kámeletke tolmaǵan esepke alynǵan. Olardyń ata-analary balalardy tárbıeleý mіndetіn tıіsіnshe oryndamaǵany úshіn jaýapqa tartyldy. Sonymen qatar bіr ata-anaǵa jasóspіrіmnіń usaq buzaqylyq áreketі úshіn de jaza qoldanylǵan.

Is kámeletke tolmaǵandar іsі jónіndegі komıssııanyń qaraýyna jіberіldі. Tergeý barysy erekshe baqylaýǵa alynyp, oqıǵaǵa qatysy bolýy múmkіn basqa tulǵalardyń da áreketterі tekserіlіp jatyr.