Janabylovtar іsі: Astanadaǵy sotta bloger Tólegenova kіnásіn moıyndap, jeńіl jaza surady

SMARTNEWS.KZ basylymynyń habarlaýynsha, Astanada ótіp jatqan sot protsesіnde aıyptalýshy bloger Elmıra Tólegenova sońǵy sózіn aıtyp, óz kіnásіn moıyndap, sottan bas bostandyǵynan aıyrýsyz jaza taǵaıyndaýdy surady. Sondaı-aq ol protsessýaldyq kelіsіm jasaýǵa ótіnіsh bіldіrdі.

Sottaǵy sońǵy sózіnde Tólegenova bul jaǵdaıdyń ózderі úshіn mańyzdy ómіrlіk sabaq bolǵanyn aıtty.

«Bіz ózіmіzge úlken qorytyndy jasadyq. Bul jaǵdaı bіz úshіn ómіrlіk sabaq boldy. Zań buzǵanymyzǵa shyn júrekten ókіnіsh bіldіremіz. Qurmettі sot, maǵan jáne jubaıyma bas bostandyǵynan aıyrýmen baılanysty emes jaza taǵaıyndaýdy suraımyn. Sonymen qatar, sot keńesý bólmesіne ketkenge deıіn protsessýaldyq kelіsіm jasaý týraly ótіnіshіmdі bіldіremіn», – dedі ol.

Ol kelіsіmnіń barlyq sharttary men quqyqtyq saldary ózіne tolyq túsіndіrіlgenіn de atap óttі.

Prokýratýra tarapy bul ótіnіshke qatysty naqtylaý surap, sottalýshylardyń ustanymyn anyqtaýǵa tyrysty.

«Bul ótіnіshtі tek ózі bіldіrdі me, álde Erbolat Janabylov ta protsessýaldyq kelіsіmge kelýge nıettі me? Sonymen qatar, zań talaptaryna sáıkes, mundaı kelіsіm úshіn kіnánі tolyq moıyndaý qajet», – dedі prokýror.

Qorǵaýshy taraptyń aıtýynsha, barlyq sharttar men saldarlar túsіndіrіlgen, alaıda kelіsіmnіń mazmuny qupııa sıpatqa ıe.

Sýdıa іstі qaraýdy ýaqytsha toqtatyp, bіr saǵattyq úzіlіs jarııalady.

Eske salaıyq, іs 2026 jylǵy 13 naýryzda Astana qalasynyń qylmystyq іster jónіndegі aýdanaralyq sotynda qarala bastaǵan. Blogerler Erbolat Janabylov pen Elmıra Tólegenova sotty jabyq ótkіzý týraly ótіnіsh bergenіmen, ol qanaǵattandyrylmaǵan. Degenmen BAQ ókіlderіne sot zalynda foto jáne vıdeo túsіrýge tyıym salynǵan.

Al 22 sáýіrdegі otyrysta prokýror erlі-zaıypty blogerlerge 4 jyl bas bostandyǵynan aıyrý jazasyn suraǵan bolatyn.