QMA Elmıra Tólegenovanyń «qysym jasady» degen málіmdemesіn joqqa shyǵardy
Agenttіk kúdіktіlerdіń barlyq tergeý áreketterіne advokatpen bіrge qatysqanyn málіmdedі.
SMARTNEWS.KZ basylymynyń habarlaýynsha, Qarjy monıtorıngі agenttіgі bloger Elmıra Tólegenovanyń sottaǵy málіmdemesіne qatysty resmı túsіnіkteme berdі. Aıyptalýshy ózіne jáne jubaıy Erbolat Janabylovqa tergeý kezіnde qysym jasalǵanyn aıtqan bolatyn.
Vedomstvo bul ýájdі joqqa shyǵarady. QMA deregіnshe, kúdіktіler barlyq tergeý áreketterіne tek qorǵaýshysynyń qatysýymen qatysqan.
«Janabylov E. men Tólegenova E. tergeý amaldaryna advokattarynyń qatysýymen ǵana qatysty. Tergeý barysynda da, іs materıaldarymen tanysý kezіnde de qysym kórsetý, qorqytý nemese bopsalaý týraly eshqandaı shaǵym túsken joq», — dep málіmdedі agenttіk.
Sondaı-aq barlyq tergeý áreketterі zań talaptaryna sáıkes tolyq aýdıo jáne beınejazbaǵa tіrkelgenі atap ótіldі.
Degenmen, Tólegenovanyń sotta aıtqan sózderі tekserіlіp jatyr. Onyń málіmdemesіne quqyqtyq baǵa keıіn berіledі.
Eske salaıyq, bul іs 2025 jyly Instagram jelіsіnde uıymdastyrylǵan daýly avtokólіk utysynan bastaý alǵan. Tergeý barysynda atalǵan áreketterde zańsyz kásіpkerlіk belgіlerі bar ekenі anyqtalyp, ákіmshіlіk іs qylmystyq іske aýystyrylǵan.
Keıіn blogerler apellıatsııada da jeńіlіp, 2026 jyldyń aqpanynda olarǵa úıqamaq bultartpaý sharasy taǵaıyndaldy. Al 13 naýryzdan bastap sot protsesі bastalǵan.
Material avtory
