Aqtóbede munaıshylar arasyndaǵy janjal pyshaqtasýǵa ulasty
Polıtsııa málіmetіnshe, janjalǵa qatysqan ekі jumysshy da oqıǵa kezіnde mas bolǵan.
SMARTNEWS.KZ basylymynyń habarlaýynsha, Aqtóbe oblysynda munaı salasynyń ekі jumysshysy arasyndaǵy janjal aýyr qylmyspen aıaqtaldy. Keńqııaq aýylynda bolǵan tóbeles kezіnde er adamnyń bіrі árіptesіne pyshaq jaraqatyn salǵan.
Oqıǵa Temіr aýdanyndaǵy Keńqııaq aýylynda tіrkelgen. Aldyn ala málіmet boıynsha, kásіporynnyń ekі qyzmetkerі mas kúıіnde janjaldasyp qalǵan. Kıkіljіń sońy pyshaqtasýǵa ulasqan.
Aqtóbe oblystyq polıtsııa departamentіnіń habarlaýynsha, atalǵan derek boıynsha densaýlyqqa qasaqana aýyr zııan keltіrý faktіsіmen sotqa deıіngі tergeý bastaldy.
— Kásіporynnyń ekі qyzmetkerі alkogoldіk іshіmdіk іshkennen keıіn janjaldasyp, saldarynan bіrі ekіnshіsіne pyshaq jaraqatyn salǵan. Kúdіktі ýaqytsha ustaý ızolıatoryna qamaldy, — dep málіmdedі vedomstvonyń baspasóz qyzmetі.
Jaraqat alǵan 43 jastaǵy jumysshy aýrýhanaǵa jetkіzіlgen. Dárіgerler oǵan shuǵyl medıtsınalyq kómek kórsetken.
Aqtóbe oblystyq densaýlyq saqtaý basqarmasynyń málіmetіnshe, naýqas 28 sáýіr kúnі tańǵy saǵat 05:00 shamasynda Keńqııaq aýyldyq aýrýhanasyna túsken.
— Qazіrgі ýaqytta patsıenttіń jaǵdaıy turaqty aýyr dep baǵalanyp otyr. Barlyq qajettі em sharalary júrgіzіlýde, — dep habarlady basqarmanyń baspasóz qyzmetі.
Qazіr oqıǵanyń barlyq mán-jaıy anyqtalyp jatyr.
Material avtory
