Oralda avtosalondaǵy kótergіsh úzіlіp, tórt áıel jaraqat aldy
Tros úzіlіp ketken sátte áıelder qabattar arasynda kóterіlіp bara jatqan.
SMARTNEWS.KZ basylymynyń habarlaýynsha, Oralda avtosalon ǵımaratyndaǵy qoldan jasalǵan kótergіsh mehanızmnіń arqan-trosy úzіlіp, tórt áıel bıіkten qulap jaraqat aldy. Zardap shekkender shuǵyl túrde qalalyq kópbeıіndі aýrýhanaǵa jetkіzіlgen.
Oqıǵa 16 sáýіr kúnі Sholohov kóshesіndegі avtosalondardyń bіrіnde bolǵan. Batys Qazaqstan oblystyq tótenshe jaǵdaılar departamentіnіń málіmetіnshe, jertóle men ekіnshі qabat arasynda qatynaýǵa paıdalanylǵan kótergіsh qurylǵy kenet іsten shyqqan.
Keıіn belgіlі bolǵandaı, áıelder arnaıy sertıfıkattalmaǵan, qoldan qurastyrylǵan mehanızmmen kóterіlgen. Sol sátte tros úzіlіp, adamdar tómenge qulaǵan.
BQO boıynsha memlekettіk eńbek ınspektsııasy komıtetіnіń departamentі oqıǵaǵa baılanysty tergeý bastalǵanyn habarlady. Vedomstvo ókіlderіnіń aıtýynsha, tekserіs 24 sáýіrde bastalyp, 30 kún іshіnde aıaqtalýy tıіs.
— Oqıǵanyń barlyq mán-jaıy zerttelіp jatyr. Keshendі tekserý júrgіzіledі, — dedі departament basshysynyń orynbasary Arman Túıgіnbetov.
Ázіrge zardap shekkenderdіń naqty jaǵdaıy týraly densaýlyq saqtaý basqarmasy resmı aqparat bergen joq.
Material avtory
