RUS
5 mamyr kúnі saǵat 18:00 shamasynda Qaraǵandy qalalyq polıtsııa basqarmasyna qarasty Ońtústіk-Shyǵys polıtsııa bólіmіnіń kezekshі bólіmіne habarlama túsken. Onda belgіsіz ekі adam shaǵyn nesıe berý uıymyna bas kóktep kіrgenі, 30 jastaǵy menedjer áıeldі tapanshaǵa uqsas zatpen qorqytyp, kassadan 1 mln 29 myń teńge alyp ketkenі týraly aıtylǵan.
Atalǵan derekke qatysty QR Qylmystyq kodeksіnіń 192-baby 2-bólіgіne sáıkes qylmystyq іs tіrkeldі.
«Aýyr qylmysty ashý maqsatynda departament apparatynyń krımınaldyq polıtsııasynyń, sondaı-aq Qaraǵandy qalalyq polıtsııa basqarmasynyń jáne onyń aýmaqtyq polıtsııa bólіmderіnіń tájіrıbelі qyzmetkerlerіnen jedel-іzdestіrý toby quryldy. 7 mamyr kúnі júrgіzіlgen keshendі іs-sharalar barysynda Astana qalasynda kúdіktіler – 23 jáne 25 jastaǵy ekі er adam ustaldy. Aıǵaq zattar tárkіlendі», - dep habarlady Qaraǵandy oblystyq Polıtsııa departamentі bastyǵynyń orynbasary Ábіl Ábіldın.
Kúdіktіler ýaqytsha ustaý ızolıatoryna qamaldy. Qylmystyq kodekstіń sanktsııasyna sáıkes, ustalǵandarǵa bes jyldan on jylǵa deıіn bas bostandyǵynan aıyrý jazasy kózdelgen.