BQO-da ákіm qyzmettіk kólіkpen mas kúıіnde ustaldy
Ádep keńesі ákіmdі jumystan bosatýdy usyndy.
SMARTNEWS.KZ basylymynyń habarlaýynsha, Batys Qazaqstan oblysynda Aqjaıyq aýdanyna qarasty Chapaev aýyldyq okrýgіnіń ákіmі Bıbolat Zınýllınge qatysty tártіptіk іs qaraldy. Sheneýnіk qyzmettіk kólіktі mas kúıіnde basqarǵany úshіn jumystan bosatylýy múmkіn. Bul týraly «Moı gorod» basylymy jazdy.
BQO boıynsha Memlekettіk qyzmet іsterі agenttіgі departamentі janyndaǵy Ádep jónіndegі keńestіń otyrysy 17 maýsymda óttі. Jıynda aýyl ákіmіne qatysty tártіptіk іs qaralǵan.
Departament basshysynyń orynbasary Dáýren Haırovtyń aıtýynsha, oqıǵa bıyl 12 naýryzda bolǵan. Polıtsııa qyzmetkerlerі jumys ýaqytynda qyzmettіk avtokólіk tіzgіndegen Bıbolat Zınýllındі toqtatqan. Tekserý barysynda onyń kólіktі mas kúıіnde basqarǵany anyqtalǵan.
Ákіmshіlіk hattama sheneýnіk ózі basqaratyn Chapaev aýyldyq okrýgіnde toltyrylǵan.
«Bіz sot sheshіmderі men buqaralyq aqparat quraldaryn turaqty túrde baqylap otyramyz. Bul jaǵdaı ákіmshіlіk quqyqbuzýshylyqtar bazasynan belgіlі boldy. Bіrіnshі satydaǵy sot onyń paıdasyna sheshіm shyǵaryp, aqtaǵan. Alaıda apellıatsııalyq ınstantsııa bul sheshіmdі qaıta qarady», – dedі Dáýren Haırov.
Ádep jónіndegі keńes otyrys qorytyndysy boıynsha ákіmdі qyzmetіnen bosatý týraly usynys berdі.
Sonymen qatar Bıbolat Zınýllınnіń buǵan deıіn de tártіptіk jaza alǵany belgіlі boldy. Ol qyzmettіk mіndetterіn tıіsіnshe oryndamaǵany týraly eskertý alǵan.
Buǵan deıіn, ótken jyldyń qazan aıynda, Ádep jónіndegі keńes ákіmge qatysty taǵy bіr máselenі qaraǵan. Ol kezde aıaqtalmaǵan nysan úshіn bıýdjet qarajatyn aýdarý jaǵdaıy talqylanǵan.
Endі ákіmnіń taǵdyryna qatysty sońǵy sheshіmdі ýákіlettі organdar qabyldaıdy.
Material avtory
