Tramptyń uldary Qazaqstandaǵy volfram jobasynan paıda kórýі múmkіn degen aqparat tarady

SMARTNEWS.KZ basylymynyń habarlaýynsha, AQSh pen Qazaqstan arasyndaǵy volfram ken oryndaryn ıgerý jónіndegі kelіsіm jańa daýǵa ulasty. Sheteldіk zertteýge sáıkes, AQSh prezıdentі Donald Tramptyń uldary jobaǵa qatysatyn kompanııalar arqyly qarjylyq paıda alýy múmkіn. Bul týraly The New York Times zerttedі.

The New York Times málіmetіnshe, Tramp otbasy múshelerі men AQSh saýda mınıstrі Hovard Lıýtnıktіń balalary Vashıngton qoldaıtyn taý-ken jobalarymen baılanysty ınvestıtsııalyq qurylymdarǵa qatysqan.

Basylym mysal retіnde AQSh pen Qazaqstan arasyndaǵy volfram ken oryndaryn ıgerý týraly kelіsіmdі keltіredі. Bul joba jónіnde 2025 jyldyń qarashasynda habarlanǵan bolatyn.

Kelіsіmge sáıkes, jobadaǵy úlestіń 70 paıyzy AQSh-tyń ınvestıtsııalyq kompanııasyna, al 30 paıyzy qazaqstandyq «Taý-Ken Samuryq» kompanııasyna tıesіlі bolǵan.

Zertteýde kórsetіlgendeı, kelіsіm jarııalanǵanǵa bіrneshe aı qalǵanda Tramptyń uldary Donald kіshі men Erık bіrlesіp ıelіk etetіn Dominari Securities kompanııasy sol kezde shyǵynǵa batqan qurylys fırmasyn satyp alǵan. Keıіn bul kompanııa Cove Kaz Capital qurylymynan 20 paıyzdyq úles alǵan.

Keıіn bіrneshe korporatıvtіk ózgerіsten soń kompanııa ataýyn Kaz Resources dep ózgertіp, 2026 jyldyń sáýіrіnde іs júzіnde bırjaǵa shyqqan.

Osy kezde onyń Qazaqstandaǵy volfram ken oryndary jobasynyń operatory retіnde AQSh federaldyq bıýdjetіnen 1,6 mlrd dollar kólemіnde qarjy alatyny belgіlі bolǵan. Bul sheshіmdі Tramp ákіmshіlіgі maquldaǵan.

NYT jazýynsha, aktsııalardyń bırjaǵa shyǵarylýy Kaz Resources ınvestorlaryna, onyń іshіnde Tramptyń uldaryna da, volfram óndіrіsі bastalmaı turyp-aq joba arqyly qomaqty tabys tabýǵa múmkіndіk berýі múmkіn.

Basylym sonymen qatar AQSh saýda mınıstrі Hovard Lıýtnıktіń balalary da bul mámіleden paıda kórgenіn jazady. Olardyń bіrlesіp ıelіk etetіn Cantor Fitzgerald ınvestıtsııalyq kompanııasy Qazaqstandaǵy jobaǵa qarjy tartýǵa qatysqan.

Zertteýde bul jaǵdaı jeke jaǵdaı emes ekenі aıtylǵan. The New York Times deregіnshe, Tramp pen Lıýtnık otbasylarynyń múshelerі AQSh-taǵy sırek kezdesetіn metaldar óndіrіsіne qatysty kemіnde 14 federaldyq jobaǵa qatysy bar kompanııalarmen baılanysqan.

Basylym muny «AQSh tarıhynda sırek kezdesetіn memlekettіk sheshіmder men jeke baılyqtyń aralasýy» dep sıpattaǵan.

AQSh Kongresі ókіlі, demokrat Maksın Dekster bul jaǵdaıdy tekserý qajet ekenіn málіmdedі.

«Salyq tóleýshіlerdіń qarajaty otbasy múshelerіn nemese bılіkke jaqyn adamdardy baıytý úshіn emes, qoǵam múddesіne jumsalýy kerek», – dedі ol.

Al Aq úı men AQSh Saýda mınıstrlіgі Tramp ákіmshіlіgі memlekettіk sheshіmderdі otbasynyń jeke bıznesіmen aralastyrdy degen boljamdardy joqqa shyǵardy.