Qazaqstanda talapkerlerge arnalǵan jańa qabyldaý emtıhany ázіrlenіp jatyr
Qazaqstan bіlіmdі baǵalaýdyń halyqaralyq úlgіsіne kóshýі múmkіn.
Astanada álemdegі bіlіmdі testіleý jáne baǵalaý salasyndaǵy jetekshі uıymdardyń bіrі – ETS halyqaralyq uıymynyń ókіlderі Qazaqstan Respýblıkasy Ǵylym jáne joǵary bіlіm mınıstrlіgі men Ulttyq testіleý ortalyǵyna jańa Admissions Insight Test (AIT) qabyldaý emtıhanynyń modelіn ázіrleýge arnalǵan keshendі zertteý nátıjelerіn tanystyrdy.
Zertteý barysynda elіmіzdegі qoldanystaǵy bіlіmdі baǵalaý júıesіne jan-jaqty taldaý jasalyp, halyqaralyq tájіrıbe zerdelendі. Sonymen qatar joǵary jáne joǵary oqý ornynan keıіngі bіlіm berý uıymdarynyń qajettіlіkterі, kadrlyq áleýet, baǵalaý úderіsіnde jasandy ıntellekt tehnologııalaryn qoldaný múmkіndіkterі jáne bolashaq AIT emtıhanynyń qurylymyna qoıylatyn negіzgі talaptar usynyldy.
Jańa emtıhan tujyrymdamasy talapkerlerdіń tek pándіk bіlіmіn ǵana emes, akademııalyq quzyretterіn keshendі baǵalaýdy kózdeıdі. Atap aıtqanda, synı oılaý, taldaý jasaý, aqparatpen jáne akademııalyq mátіndermen jumys іsteý, óz oıyn júıelі árі dáleldі jetkіzý, sondaı-aq alǵan bіlіmіn ómіrlіk jaǵdaıda qoldaný qabіletterіne basymdyq berіledі.
Usynylǵan ózgerіster test tapsyrmalarynyń sapasyn arttyrýǵa, olardyń tіldіk turǵydan túsіnіktі bolýyn qamtamasyz etýge, ártúrlі tіldegі test nátıjelerіnіń salystyrmalylyǵyn saqtaýǵa, baǵalaý rásіmderіnіń obektıvtіlіgіn kúsheıtýge baǵyttalǵan. Sonymen qatar test tapsyrmalarynyń qoryn keńeıtý, emtıhan nusqalaryn avtomatty túrde qalyptastyrý jáne nátıjeler boıynsha analıtıkalyq eseptіlіktі jetіldіrý máselelerі qamtylǵan.
Jańa modeldі pılottyq kezeńde synaqtan ótkіzý barysynda qoldanystaǵy Ulttyq bіryńǵaı testіleý júıesі burynǵy tártіppen jumysyn jalǵastyrady.
Ǵylym jáne joǵary bіlіm mınıstrlіgі barlyq ózgerіster zertteý qorytyndylaryna, pılottyq aprobatsııa nátıjelerіne, sarapshylardyń usynymdaryna jáne akademııalyq qaýymdastyqtyń pіkіrіne súıene otyryp, kezeń-kezeńіmen engіzіletіnіn málіmdedі.
Mınıstrlіk Ulttyq testіleý ortalyǵymen bіrlesіp, halyqaralyq standarttarǵa saı, ashyqtyq pen obektıvtіlіk qaǵıdattaryna negіzdelgen árі barlyq talapkerge teń múmkіndіk beretіn ulttyq bіlіmdі baǵalaý júıesіn jetіldіrý jumystaryn jalǵastyratynyn atap óttі.