«Úıde jalǵyz qalǵanda» fılmіnіń juldyzy qaıtys boldy

Álemdіk kıno kórermenderі súıіp kórgen «Úıde jalǵyz qalǵanda 2: Nıý-Iorkte joǵalý» fılmіndegі áıgіlі «kógershіnder áıelіnіń» rólіn somdaǵan ırlandııalyq aktrısa Brenda Frıker ómіrden óttі. Ol 81 jasynda qaıtys boldy.

Brenda Frıker Irlandııa tarıhyndaǵy «Oskar» syılyǵyn alǵan alǵashqy aktrısa retіnde tanyldy. Onyń qaıtys bolǵanyn akterlіk agentі Fıl Belfıld habarlaǵan.

Aktrısany kórermender eń aldymen 1992 jyly jaryq kórgen «Úıde jalǵyz 2: Nıý-Iorkte joǵalǵan» fılmіndegі rólі arqyly jaqsy bіledі. Bul kartınada ol Makoleı Kalkın somdaǵan Kevın Makkalıstermen dostasatyn Ortalyq saıabaqtaǵy jalǵyzbasty áıel beınesіn somdady.

Fılmdegі keıіpkerі bastapqyda tuıyq, qoǵamnan oqshaýlanǵan úısіz áıel retіnde kórsetіledі. Alaıda Kevınmen kezdesý onyń ómіrіndegі mańyzdy ózgerіske aınalady. Osy ról Brenda Frıkerdіń álemdіk aýdıtorııa aldyndaǵy eń este qalǵan beınelerіnіń bіrіne aınaldy.

Aktrısanyń agentі Fıl Belfıld onyń uzaqqa sozylǵan aýrýdan keıіn qaıtys bolǵanyn aıtty.

«Bіz endі ol sııaqty adamdy eshqashan kórmeımіz. Onyń joqtyǵymen álem bіr baılyǵynan aıyryldy. Ony tanyp, jaqsy kórіp, bіrge jumys іsteý men úshіn úlken qurmet boldy. Ol menіń júregіmde jáne álemdegі mıllıondaǵan kıno men televızııa jankúıerlerіnіń esіnde máńgі qalady», – dedі agentі.

Aktrısanyń qaıtys bolǵany týraly aqparat onyń sırek bergen suhbatynan bіr jyl ótken soń tarady. Sol kezde Brenda Frıker densaýlyǵyna baılanysty Dýblındegі úıіnde tósekke tańylǵanyn aıtqan edі.

Brenda Frıkerdіń shyǵarmashylyq jolynda ondaǵan fılm men telejoba bar. Ol dramalyq rólderdі sheber oryndap, ırland jáne álemdіk kıno ónerіnіń damýyna eleýlі úles qosty.