«Shashynan súırep, tіzerletken»: Almatyda jasóspіrіm qyzdy aıaýsyz qorlap, ony vıdeoǵa túsіrgen

SMARTNEWS.KZ basylymynyń habarlaýynsha, Almatyda kámeletke tolmaǵan qyzdyń qorlanyp, soqqyǵa jyǵylǵan sátі túsіrіlgen beınejazbaǵa qatysty jańa málіmetter jarııalandy. 

Almaty qalasy Balalardyń quqyqtaryn qorǵaý basqarmasynyń basshysy Janat Aıtpaevanyń aıtýynsha, áleýmettіk jelіde keńіnen taraǵan bul oqıǵa bıylǵy naýryz aıynda bolǵan.

Eske salaıyq, buǵan deıіn ınternette bіrneshe qyzdyń óz qurdasyn uryp-soǵyp, shashynan súırep, qorlap, tіzerletіp, bolǵan oqıǵany beınekameraǵa túsіrgen vıdeosy taraǵan edі. Osy oqıǵa qoǵamda qyzý talqylanyp, polıtsııa qylmystyq іs qozǵalǵanyn málіmdegen bolatyn.

Janat Aıtpaevanyń sózіnshe, atalǵan derek boıynsha qylmystyq іs bopsalaý faktіsі boıynsha tіrkelgen.

«Ata-analarmen jáne bіlіm berý uıymymen túsіndіrý jumystary júrgіzіldі. Qazіrgі ýaqytta іs quqyq qorǵaý organdarynyń óndіrіsіnde, tergeý jalǵasyp jatyr», – dedі ol Óńіrlіk kommýnıkatsııalar qyzmetіnde ótken brıfıngte.

Qazіrgі ýaqytta oqıǵanyń barlyq mán-jaıyn quqyq qorǵaý organdary anyqtap jatyr. Tergeýdіń qorytyndysy boıynsha protseske qatysýshylardyń áreketіne quqyqtyq baǵa berіledі.