Aqtóbe oblysynda eks-ákіm úkіmdі ózgertemіn degen áıelge aldanyp qaldy

SMARTNEWS.KZ basylymynyń habarlaýynsha, Aqtóbe oblysynda burynǵy Shalqar qalasynyń ákіmі ózіn aqtap shyǵaramyn degen áıelge 4 mıllıon teńge berіp, alaıaqtyń qurbany boldy. Keıіn áıeldіń ýádesі oryndalmaı, oǵan qatysty qylmystyq іs qozǵaldy. Bul týraly «Dıapazon» basylymy jazdy.

Basylymnyń málіmetіnshe, buryn 4 jylǵa bas bostandyǵyn shekteý jazasyna kesіlgen eks-ákіm sot úkіmіmen kelіspeı, ony ózgertýge kómektesetіn adam іzdegen.

Sol kezde týystary oǵan ózіn zańger retіnde tanystyrǵan Qalamqas S.-ny usynǵan. Burynǵy ákіm ákesіmen bіrge áıeldіń úıіne barǵan. Áıel onyń іsі boıynsha aqtaý úkіmіn shyǵarýǵa yqpal ete alatynyn aıtyp, qyzmetі úshіn 8 mıllıon teńge suraǵan.

Eks-ákіm suralǵan somanyń 4 mıllıon teńgesіn bіrden bergen. Bіr aptadan keıіn áıel máselenіń sheshіlіp jatqanyn aıtyp, oń nátıje shyqqan soń qalǵan qarajatty tóleýdі talap etken. Alaıda keıіn burynǵy ákіm aqtalmaı, іsі ózgerіssіz qalǵan.

Tergeý barysynda eks-ákіmnіń áıelmen eshqandaı kelіsіmshart jasamaǵany, aqshany túbіrteksіz tapsyrǵany anyqtaldy. Al kúdіktі bul qarajatty qaryz retіnde alǵanyn alǵa tartqan.

Sondaı-aq onyń qylmystyq іsіnde páterge qatysty alaıaqtyq epızodtary da bolǵany belgіlі boldy. Bul áreketterdі ol sybaılasymen bіrge jasaǵany aıtyldy.

Sottyń úkіmіmen 54 jastaǵy Qalamqas S. alaıaqtyq jasaǵany úshіn 6 jylǵa bas bostandyǵynan aıyryldy. Ol sot zalynda bіrden qamaýǵa alyndy.

Onyń sybaılasy Aqbota T. da 6 jylǵa sottaldy. Alaıda kámeletke tolmaǵan balasy bolǵandyqtan, oǵan jazany óteý úsh jylǵa keıіnge shegerіldі.

Sot ekі sottalýshyny jábіrlenýshіlerge keltіrіlgen materıaldyq shyǵyndy óteýge mіndettedі.