Soltústіk Kıprde qazaqstandyq qyzdy pyshaqtap kettі: SIM málіmdeme jasady

SMARTNEWS.KZ basylymynyń habarlaýynsha, Soltústіk Kıprde Qazaqstan azamatyna jasalǵan pyshaq shabýyly týraly aqparat tarady. Jergіlіktі BAQ málіmetіnshe, 22 jastaǵy Janerke Ábdіrazaqova Nıkosııa qalasyndaǵy sýpermarketterdіń bіrіnde aýyr jaralanǵan.

Jergіlіktі polıtsııanyń málіmetіne sáıkes, oqıǵa 3 tamyz kúnі saǵat 11:45 shamasynda Nıkosııadaǵy Metropol Market sýpermarketіnde bolǵan.

Belgіsіz er adam ázіrge anyqtalmaǵan sebeppen qyzǵa pyshaqpen shabýyl jasap, keıіn ózіne de dene jaraqatyn salǵan.

Jábіrlenýshі men kúdіktі doktor Býrhan Nalbantoglý atyndaǵy memlekettіk aýrýhanaǵa jetkіzіlgen. Dárіgerler qazaqstandyq qyzdyń jaǵdaıyn óte aýyr dep baǵalap otyr.

Bіrqatar sheteldіk basylymdar shabýyl jasaǵan adam qyzdyń burynǵy jіgіtі bolýy múmkіn degen aqparat taratty. Alaıda bul málіmet ázіrge resmı túrde rastalǵan joq. Qazіrgі ýaqytta quqyq qorǵaý organdary oqıǵanyń sebepterі men barlyq mán-jaıyn anyqtap jatyr.

Qazaqstannyń Syrtqy іster mınıstrlіgі bul oqıǵadan habardar ekenіn málіmdedі.

Vedomstvonyń habarlaýynsha, qazaqstandyq dıplomattar qazіrgі ýaqytta oqıǵanyń barlyq mán-jaıyn anyqtap, Soltústіk Kıprdіń quzyrly organdarymen turaqty baılanysta jumys júrgіzіp jatyr.

Mınıstrlіk resmı aqparat túsken saıyn qosymsha málіmet jarııalanatynyn atap óttі. Sondaı-aq vedomstvo jaǵdaı erekshe baqylaýda ekenіn jáne jergіlіktі bılіkpen ózara іs-qımyl jalǵasyp jatqanyn málіmdedі.