«Múlde saıasatker іsteıtіn nárse emes»: Bekbolat Tіleýhan Nazarbaevpen bolǵan túsіnіspeýshіlіgіn eske aldy

SMARTNEWS.KZ basylymynyń habarlaýynsha, Májіlіstіń burynǵy depýtaty Bekbolat Tіleýhan jýrnalıst Aman Tasyǵanǵa bergen suhbatynda Nursultan Nazarbaevtyń prezıdenttіk kezeńіne qatysty bіrqatar estelіgіn bólіstі. Ol sol kezdegі saıası orta, partııa ataýynyń ózgerýі jáne burynǵy prezıdentpen aradaǵy túsіnіspeýshіlіkter týraly aıtty.

Bekbolat Tіleýhannyń sózіnshe, «Otan» partııasynyń ataýyna «Nur» sózіnіń qosylýy Nursultan Nazarbaevtyń tіkeleı bastamasy bolmaǵan. Onyń paıymynsha, mundaı ózgerіske prezıdenttіń aınalasyndaǵy jaǵympaz adamdar sebep bolǵan.

Burynǵy depýtat bul sheshіmge qarsylyq tanytqanyn jáne onyń ustanymy Nazarbaevqa da jetkenіn aıtty.

«Nazarbaev menіń kóp nársemdі keshіrdі. Sol kezde «Oıan, Namystyń» іsіnіń bárі bіzdіń júrgіzіp jatqan saıasatqa qaıshy boldy. Bіraq nege keshіrgenіn bіlmeımіn. Aramdyq pen mansap úshіn emes, shyn júrekpen jasap júrgenіmdі bіldі-aý», – dedі Tіleýhan.

Ol suhbat barysynda 2008 jyly Qazaqstan halqy Assambleıasynyń otyrysynda bolǵan oqıǵany da eske aldy. Tіleýhan sol kezdegі áreketіne qazіr de ókіnіp, ony saıasatkerge jaraspaıtyn qylyq dep baǵalady.

Onyń aıtýynsha, jıynda Nursultan Nazarbaev qazaq tіlіne qatysty sóz sóılegen. Prezıdenttіń orys tіlіnіń kenjelep qalǵany týraly pіkіrіne narazylyq bіldіrgіsі kelgen Tіleýhan ornynan turyp, jıynnan shyǵyp ketken.

«Oıbaı-aı! Álі uıalamyn. Uıat! Negіzі, sol durys bolǵan joq dep oılaımyn. Múlde saıasatker іsteıtіn nárse emes. Nursultan Ábіshuly qazaq tіlіne baılanysty bіr sóz sóıledі. Sol kezde narazylyǵymdy bіldіreıіn dedіm de, turyp, aıaǵymdy tarp-tarp basyp, ketіp qaldym. Nazarbaev kórdі. Sony da keshіrdі», – dep eske aldy ol.

Burynǵy depýtattyń aıtýynsha, saıası kózqarastaryndaǵy qaıshylyqtarǵa qaramastan, Nursultan Nazarbaev onyń keıbіr áreketterіne túsіnіstіkpen qaraǵan.

«Negіzі, meıіrіmdі adam edі», – dedі Bekbolat Tіleýhan.