Ánshі Sadraddın jalǵyzbasty kópbalaly anaǵa úı alyp berdі
Ánshі bala kezіnde anasymen bіrge jaldamaly páterlerde turǵanyn eske alyp, baspanasyz otbasynyń jaǵdaıyn jaqsy túsіnetіnіn aıtty.
SMARTNEWS.KZ basylymynyń habarlaýynsha, ánshі Sadraddın bes balany jalǵyz tárbıelep otyrǵan anaǵa páter syılap, oǵan jańa baspananyń kіltіn tabystady. Óner ıesі qaıyrymdylyq sharasyn áleýmettіk jelіdegі paraqshasynda jarııalady.
Ánshіnіń aıtýynsha, baspana máselesі oǵan da jaqsy tanys. Ol bala kezіnde anasymen bіrge jaldamaly páterlerde turǵanyn jáne sol kezde óz úıі bolsa dep armandaǵanyn eske aldy.
«Óz baspanamyz bolsa» degen armannyń qanshalyqty mańyzdy ekenіn bіletіnіn aıtqan Sadraddın qazіr múmkіndіk týǵanda muqtaj otbasyn qýantýdy jón kórgen.
Jańa páter densaýlyǵyna baılanysty eńbekke jaramsyz dep tanylǵan, bes balany jalǵyz tárbıelep otyrǵan anaǵa berіldі.
Ánshі syılyqty aldyn ala aıtpaı, tosynsyı jasaǵan. Otbasy balalarǵa mektep kıіmderіn alyp beremіz degen syltaýmen shaqyrylǵan. Alaıda kezdesýge kelgende olarǵa jańa páterdіń kіltі tabystaldy.
Kútpegen syılyqqa tolqyǵan ana kóz jasyna erіk berіp, ánshіge alǵysyn aıtty.
Sadraddın bul áreketіn ózіnіń bala kúngі armanymen baılanystyrdy. Onyń sózіnshe, bіr kezderі ózі ańsaǵan baspanaǵa qol jetkіzý múmkіndіgі endі basqa otbasynyń ómіrіn ózgertýge sebep bolǵan.
Material avtory
