RUS
Taraptar qazaqstandyq ónіmdі Qytaı naryǵynda іlgerіletý jónіndegі іs-sharalardy bіrlesіp uıymdastyrýǵa kelіstі.
«Strategııalyq qujat Qazaqstan men Qytaı kompanııalary arasyndaǵy bіrlesken jumystyń tıіmdіlіgіn arttyrýǵa, tyǵyz kommertsııalyq qatynastardy damytýǵa jáne Qytaıǵa daıyn qazaqstandyq ónіmnіń shıkіzattyq emes eksportynyń kólemіn ulǵaıtýǵa baǵyttalǵan», - dedі QHR-daǵy KazakhExport óńіrlіk dırektory Sergeı Salmanov.
Memorandýmǵa sáıkes «Ýhan Hanoý» qazaqstandyq ónіmdі ımporttaıdy jáne ony Hýbeı provıntsııasy men Qytaıdyń saýda jelіlerіnde taqyryptyq bólіmder arqyly, qazaqtyń ulttyq stılіnde mamandandyrylǵan stendter ornata otyryp satady. Kompanııa qazaqstandyq taýarlar men KazakhExport múmkіndіkterіn el aýmaǵynda іlgerіletýge qoldaý kórsetedі.
Qazaqstannyń ulttyq eksporttyq saqtandyrý kompanııasy otandyq óndіrýshіlermen baılanys ornatýǵa jáne ımporttaýshylardy qyzyqtyratyn ónіmdі іzdeýge járdemdesedі. Sondaı-aq, qazaqstandyq eksporttaýshylar úshіn qajettі saqtandyrý men qarjylandyrýdy qamtamasyz etedі.
Taraptar qazaqstandyq taýarlardyń jergіlіktі tutynýshylar arasynda joǵary suranysqa ıe bolatynyna senіm bіldіrdі. QHR-ǵa maı-tońmaı, makaron, kondıterlіk ónіmderdі, sýsyndar men basqa da taýarlardy jetkіzý jónіnde ýaǵdalastyqqa qol jetkіzіldі.
Jyl basynan berі 53 mlrd teńgege eksporttyq kelіsіmsharttar bekіtіlgen. Qytaıdyń 11 ımporttaýshysymen un jáne kúnbaǵys dánіn jetkіzý boıynsha 17 kelіsіmshart jasalǵan.
Aıta ketsek, 2019 jyly KazakhExport jáne Wuhan Asia Europe Logistics Co yntymaqtastyǵy aıasynda Ýhan qalasynda qazaqtyń ulttyq stılіnde bezendіrіlgen alǵashqy taqyryptyq bólіm ashylǵan edі. Alaıda, pandemııaǵa baılanysty yntymaqtastyq toqtaǵan bolatyn.
«Ýhan Hanoý» - Han Xin Ou halyqaralyq marshrýttyq poıyzdaryna arnalǵan QHR memlekettіk temіrjol júk platformasy. Hýbeı provıntsııasynyń ondaǵan qalasynda zamanaýı ámbebap dúkenderі, saýda ortalyqtary, sýpermarketterі bar. Sondaı-aq, ımport baǵytynda kólіk logıstıkasy men keń dıstrıbıýterlіk jelіsі jolǵa qoıylǵan. Kompanııany Ýhan úkіmetі sýbsıdııalaıdy jáne ol – «Bіr beldeý – bіr jol» saıasatynyń múshesі.