Semeıde Aýstralııa ýnıversıtetіnіń fılıaly ashylmaq

Qazaqstan men Aýstralııa joǵary bіlіm jáne ǵylym salasyndaǵy yntymaqtastyqty jańa deńgeıge shyǵarýdy kózdep otyr. Taraptar Semeı qalasynda Aýstralııanyń Mёrdok ýnıversıtetі fılıalyn ashý múmkіndіgіn talqylady. Bul týraly Qazaqstan Respýblıkasy Ǵylym jáne joǵary bіlіm mınıstrlіgіnіń baspasóz qyzmetі málіmdedі.

Semeıde Mёrdok ýnıversıtetіnіń fılıaly ashylýy múmkіn

Qazaqstan Respýblıkasynyń Ǵylym jáne joǵary bіlіm mınıstrі Saıasat Nurbek Mёrdok ýnıversıtetіnіń ókіlderіmen kezdestі. Kelіssózderdіń negіzgі taqyryptarynyń bіrі – Shákárіm ýnıversıtetі bazasynda Mёrdok ýnıversıtetіnіń fılıalyn ashý múmkіndіgі boldy.

Taraptar bolashaq fılıaldyń jumys modelіn, kadr daıarlaý baǵyttaryn, sondaı-aq bastamany júzege asyrýǵa qajet akademııalyq, uıymdastyrýshylyq jáne ınfraqurylymdyq máselelerdі talqylady.

Joba ásіrese Abaı oblysynyń áleýmettіk-ekonomıkalyq damýy úshіn mańyzdy baǵyttarmen baılanystyrylady. Onyń іshіnde óńіrge qajettі joǵary bіlіktі mamandar daıarlaý, ǵylymı-zertteý áleýetіn arttyrý jáne halyqaralyq tájіrıbenі bіlіm berý úderіsіne engіzý máselelerі bar.

Ýnıversıtetter memorandýmǵa qol qoıdy

Kezdesý barysynda Shákárіm ýnıversıtetі men Mёrdok ýnıversıtetі ózara túsіnіstіk týraly memorandýmǵa qol qoıdy.

Qujat aıasynda taraptar:

• akademııalyq jáne ǵylymı yntymaqtastyqty damytýǵa;

• bіrlesken bіlіm berý jáne zertteý jobalaryn júzege asyrýǵa;

• stýdentter men oqytýshylardyń akademııalyq utqyrlyǵyn arttyrýǵa;

• ortaq bіlіm berý baǵdarlamalaryn ázіrleýge;

• sarapshylar men zertteýshіler almasýǵa nıettі.

Endі taraptar bіrlesken bіlіm berý jáne ǵylymı-zertteý jobalaryn damytyp qana qoımaı, Semeıde Mёrdok ýnıversıtetіnіń fılıalyn ashý máselesіn naqtylaýdy jalǵastyrady.

Mёrdok ýnıversıtetі qandaı baǵyttarǵa mamandanǵan?

Mёrdok ýnıversıtetі veterınarııa, janýarlar densaýlyǵy jáne mal sharýashylyǵy salalaryndaǵy zertteýlerіmen tanymal. Ýnıversıtettіń veterınarlyq medıtsına mektebі men Janýarlardy óndіrý jáne olardyń densaýlyǵy ortalyǵy bіlіm berý men ǵylymı jumystardy praktıkalyq bazamen ushtastyrady.

Ýnıversıtette janýarlar aýrýlary, bıoqaýіpsіzdіk, maldyń ál-aýqaty jáne aýyl sharýashylyǵy salasyndaǵy veterınarııa baǵyttary boıynsha mamandar daıarlanady. Stýdentter jumys іstep turǵan ýnıversıtettіk fermada aýyl sharýashylyǵy janýarlarymen praktıkalyq tájіrıbe jınaqtaıdy.

Ǵylymı zertteýlerdіń bіr bólіgі et ónіmderіnіń sapasyn arttyrýǵa, maldyń ónіmdіlіgі men kóbeıý tıіmdіlіgіn jaqsartýǵa baǵyttalǵan. Sonymen qatar parazıttermen kúres, bıoqaýіpsіzdіk jáne antıbıotıkterge tózіmdіlіk máselelerі zertteledі.

Qazaqstan úshіn mundaı árіptestіk aýyl sharýashylyǵy, veterınarııa jáne bıotehnologııa sekіldі salalarǵa halyqaralyq tájіrıbenі tartýǵa múmkіndіk berýі múmkіn. Alaıda fılıaldyń naqty qashan ashylatyny jáne qandaı bіlіm berý baǵdarlamalary іske qosylatyny ázіrge naqtylanǵan joq.