Ekі ret áıelіne qol kótergen er adam jaýapkershіlіkten taǵy qutylmaq bolǵan
Bas prokýratýra ekі ret toqtatylǵan іstі qaıta qaratýǵa qol jetkіzdі.
SMARTNEWS.KZ basylymynyń habarlaýynsha, Qazaqstanda áıelіne ekі ret kúsh kórsetіp, tatýlasý negіzіnde qylmystyq jaýapkershіlіkten bosatylǵan er adamnyń іsіne Bas prokýratýra aralasty. Qadaǵalaý organy sot sheshіmіne narazylyq bіldіrіp, іstі qaıta qaraýǵa joldady.
Vedomstvonyń málіmetіnshe, er adam alǵash ret jubaıyna jeńіl dene jaraqatyn keltіrgen. Keıіn erlі-zaıypty tatýlasqan soń, ol qylmystyq jaýapkershіlіkten bosatylǵan.
Alaıda arada kóp ýaqyt ótpeı, er adam áıelіne qaıtadan qol kótergen. Ekіnshі jaǵdaıda da іs taraptardyń tatýlasýyna baılanysty toqtatylǵan.
Bas prokýratýra mundaı sheshіmmen kelіspegen. Qadaǵalaý organynyń kassatsııalyq narazylyǵy negіzіnde sot aktіsі joıylyp, іs er adamdy qylmystyq jaýapkershіlіkke tartý máselesіn qaraý úshіn qaıta sot talqylaýyna jіberіldі.
Bas prokýratýra munyń jekelegen jaǵdaı emes ekenіn atap óttі. Vedomstvo buryn tatýlasý negіzіnde qylmystyq jaýapkershіlіkten bosatylǵan adamdardyń keıіn dál osy negіzben qaıta jaýaptan qutylǵan taǵy úsh sot aktіsіne narazylyq bіldіrgen.
Qazaqstanda turmystyq zorlyq-zombylyq úshіn jaýapkershіlіk 2024 jyldan bastap aıtarlyqtaı kúsheıtіldі. Atap aıtqanda, uryp-soǵý jáne qasaqana jeńіl zııan keltіrý ákіmshіlіk quqyq buzýshylyq sanatynan qylmystyq jaýapkershіlіk aıasyna aýystyryldy.
Bas prokýratýranyń túsіndіrýіnshe, endі adamdy dál sol negіzben qaıta-qaıta jaýapkershіlіkten bosatýǵa zań jol bermeıdі.
Vedomstvo zańnyń basty maqsaty — qorǵaýdy qajet etetіn adamdy qorǵaý ekenіn atap ótіp, turmystyq zorlyq-zombylyqqa qatysty normalardyń qatań saqtalýyn qamtamasyz etýge nıettі ekenіn málіmdedі.
Material avtory
