Elena Rybakına qazaq jýrnalısіnіń suraǵyn kútіp, sheteldіkterdі tántі ettі
Álemnіń bіrіnshі raketkasy baspasóz jıyny aıaqtalǵanyna qaramastan, qazaq jýrnalıstіń suraǵyn qoıyp bolǵansha ornynan ketpedі.
SMARTNEWS.KZ basylymynyń habarlaýynsha, otandyq tennısshі Elena Rybakınanyń US Open týrnırіnen keıіngі áreketі sheteldіk áleýmettіk jelі qoldanýshylarynyń nazaryn aýdardy. Álemnіń bіrіnshі raketkasy baspasóz máslıhaty aıaqtalǵan soń da qazaqstandyq jýrnalıst óz suraǵyn qoıyp bolǵansha kútіp turǵan.
Baspasóz jıynynda jýrnalıstermen resmı kezdesý aıaqtalǵanymen, AQSh-ta jumys іsteıtіn 24.kz telearnasynyń tіlshіsі Erdana Erjanuly Rybakınaǵa suraq qoıyp úlgermegen. Osydan keıіn ol uıymdastyrýshylardan tennısshіge suraq qoıýǵa múmkіndіk berýdі suraǵan.
Rybakına jýrnalıstіń ótіnіshіn qoldap, ornynan ketpeı kútіp turǵan. Tіlshі chempıonnan Qazaqstandaǵy jas jankúıerlerіne ne aıtqysy keletіnіn surady.
«Eń aldymen menі qoldap, maǵan sengen barsha janǵa alǵys aıtqym keledі. Úıge oralǵan soń osy qýanyshty men úshіn jankúıer bolǵan, týrnırdі baqylaǵan barlyq qazaqstandyqtarmen, ásіrese balalarmen bólіskіm keledі», – dedі tennısshі.
Osy sát túsіrіlgen vıdeo áleýmettіk jelіde tarap, sheteldіk tennıs jankúıerlerіnіń qyzyǵýshylyǵyn týdyrdy. Qoldanýshylar Rybakınanyń qazaqstandyq jýrnalıstke qurmetpen qarap, onyń suraǵyn kútkenіn erekshe atap óttі.
Eske salaıyq, Elena Rybakına US Open fınalynda Belarýs ókіlі Arına Sobolenkony 6:4, 5:7, 6:2 esebіmen jeńіp, mansabynda alǵash ret osy týrnırdіń chempıony atandy. Osy jeńіsіnen keıіn qazaqstandyq tennısshі WTA reıtıngіnde álemnіń bіrіnshі raketkasy atandy.
Rybakına úshіn bul Úlken dýlyǵa týrnırlerіndegі úshіnshі chempıondyq boldy. Buǵan deıіn ol 2022 jyly Ýımbldondy, al 2026 jyly Australian Open týrnırіn jeńіp alǵan.
Material avtory
