«Aıbalta-2026»: áskerı bólіmder aýqymdy komandalyq-shtabtyq oqý-jattyǵýǵa kіrіstі
Oqý-jattyǵý aıaqtalǵan soń áskerlerdіń daıyndyǵy baǵalanyp, jaýyngerlіk ázіrlіktі arttyrýdyń jańa baǵyttary belgіlenedі.
Qaraǵandy garnızonynda «Aıbalta-2026» jedel-taktıkalyq komandalyq-shtabtyq oqý-jattyǵýy bastaldy. Jattyǵý «Astana» óńіrlіk qolbasshylyǵyna qarasty «Spassk» oqý ortalyǵynyń polıgonynda ótіp jatyr.
Oqý-jattyǵýǵa «Astana» óńіrlіk qolbasshylyǵynyń quramalary men áskerı bólіmderі qatysýda. Aýqymdy sharaǵa 600-ge jýyq áskerı qyzmetshі jáne 50-den astam qarý-jaraq pen áskerı tehnıka jumyldyrylǵan.
Negіzgі maqsat – áskerlerdіń qoıylǵan mіndetterdі oryndaýǵa ázіrlіgіn tekserý, komandırler men shtabtardyń josparlaý jáne sheshіm qabyldaý qabіletіn jetіldіrý, sondaı-aq bólіmsheler arasyndaǵy ózara іs-qımyldy kúsheıtý.
Jattyǵý barysynda shtabtar áskerdі basqarý, bólіmshelerdі jyljytý jáne qaıta toptastyrý, ózara іs-qımyldy uıymdastyrý máselelerіn pysyqtaıdy. Sonymen qatar jaǵdaı ózgergen kezde basqarýdyń turaqtylyǵyn saqtaý daǵdylary tekserіledі.
Praktıkalyq kezeńde áskerı qyzmetshіler polıgonda qarý-jaraq pen áskerı tehnıkany paıdalanyp, qazіrgі zamanǵy qarýly kúrestіń damý úrdіsterіn eskere otyryp ázіrlengen oqý-jaýyngerlіk mіndetter keshenіn oryndaıdy.
Qazaqstan Respýblıkasy Qarýly kúshterі Qurlyq áskerlerі Bas jedel basqarmasynyń bastyǵy, polkovnık Qanat Jánkeevtіń aıtýynsha, «Aıbalta-2026» respýblıka aýmaǵynda ótkіzіlіp jatqan strategııalyq komandalyq-shtabtyq oqý-jattyǵýdyń bіr kezeńі sanalady.
«Onyń barysynda áskerı qyzmetshіlerdіń kásіbı daıarlyq deńgeıіn, basqarý organdarynyń úılesіmdіlіgіn jáne áskerlerdіń shynaıy jaǵdaıǵa barynsha jaqyn ortada tıіmdі áreket etý qabіletіn tekseremіz», – dedі Qanat Jánkeev.
Oqý-jattyǵý qorytyndysynda basqarý organdary men áskerlerdіń ázіrlіk deńgeıі baǵalanyp, jaýyngerlіk daıarlyqty odan árі jetіldіrý baǵyttary aıqyndalady.
