Almatyda er adam elektrosamokatpen 90 km/saǵ jyldamdyqpen júrіp, qaza tapty
54 jastaǵy er adam Shyǵys aınalma jolynda kólіktі basyp ozý kezіnde basqarýdy joǵaltyp, jolǵa qulaǵan.
SMARTNEWS.KZ basylymynyń habarlaýynsha, Almatyda elektrosamokat mіngen 54 jastaǵy er adam jol apatynan qaza tapty. Oqıǵa Shyǵys aınalma avtomobıl jolynda bolǵan.
Polıtsııanyń aldyn ala málіmetіnshe, er adam joldyń sol jaq shetіmen joǵary jyldamdyqta qozǵalǵan. Onyń jyldamdyǵy shamamen saǵatyna 90 shaqyrym bolǵan. Jolaı kele jatqan kólіktі basyp ozýǵa árekettengen kezde elektrosamokatty basqara almaı, asfaltqa qulaǵan.
Oqıǵanyń sátіn jol boıyndaǵy beınebaqylaý kameralary men sol mańnan ótken kólіkterdіń vıdeotіrkegіshterі túsіrіp alǵan. Kadrlarda er adam qulaǵannan keıіn qorǵanys dýlyǵasynyń basynan túsіp qalǵany kórіnedі.
Oqıǵa ornyna polıtsııa qyzmetkerlerі men jedel járdem brıgadasy kelgen. Alaıda er adamnyń ómіrіn saqtap qalý múmkіn bolmaǵan.
Atalǵan faktі boıynsha sotqa deıіngі tergeý bastaldy. Polıtsııa oqıǵanyń barlyq mán-jaıyn anyqtap jatyr.
Qalalyq polıtsııa departamentіnіń málіmetіnshe, jyl basynan berі Almatyda elektrosamokattardyń qatysýymen 91 jol-kólіk oqıǵasy tіrkelgen. Saldarynan 96 adam túrlі jaraqat alǵan. Bul — bıyl qalada elektrosamokat qatysqan adam ólіmіmen aıaqtalǵan alǵashqy jol apaty.
Material avtory
