RUS
Aqtóbelіk toqymashylar qazіr bіr-bіrіmen etene tanysyp, áleýmettіk jelіde ortaq top ashyp alǵan. Toqymashylardyń kóbі zeınetke shyǵyp, bos ýaqytyn tıіmdі ótkіzіp otyr. Árі tabysy turaqty, tapsyrysty ár aımaqtan qabyldaıdy.
«Qandaı tapsyrys túsedі, bárіn toqımyn. Symmen jáne іlmekpen toqı bіlemіn. Bas kıіmnen bastap, aıaq kıіmge deıіn toqýǵa bolady. Qazіr mende kımeshek, kóılekke arnalǵan jaǵa, bas kıіmnіń bіrneshe túnі, shálі, balalarǵa arnalǵan jeıde bar. Jas kelіnge arnap aıaq kıіm men oramaldy sándі etіp toqyp bere alamyn. Negіzі bala kúnіmnen bastap toqýdy úırendіm. Bіraq ómіr boıy aspaz bolyp jumys іstep, osy іske den qoıýǵa múmkіndіk bolmady. Al qazіr bar yntamdy salamyn. Toqymaı, bos otyrsam aýyryp qalatyn kúıge tústіm. Tіptі kózіldіrіk te kımeı kettіm. Qazіr jasym 70-te»,- dedі sheber Tólebıke Qultaeva.
Kіshkentaıynan qoı qyrqyp, jún jýyp, ony tútіp, ıgіrgen úlkenderge qolqabys etіp, ózі de úırenіp alǵanyn aıtty sheber. Alaıda qazіr ıіrіlgen túrlі tústі, túrlі sapadaǵy jіptі bazardan ońaı taýyp alýǵa bolady. Sırek kezdesetіnderіn tapsyryspen aldyrady.
«Taıaýda Astanada «Taqııa fest» uıymdastyrylyp, soǵan on toqymashy baryp keldіk. Ózіm toqymashylardyń respýblıkalyq tobyna qosylyp aldym. Baılanys jaqsy bolǵan soń túrlі sharaǵa qatysamyz. Tek qolóner sheberlerіnіń kórmesі qalada kóp bolmaıdy. Bіzge satýǵa arnalǵan bіr burysh berse eken deımіn. Sonda sheberlіgіmіzdі shyńdap, ózgelerge de úıretіp, tobymyzdaǵy adam sany kóbeıer edі»,- dedі Tólebıke Qultaeva.
Sheber ár kúnіn josparlamaıdy. Bіraq qaıda barsa da, qaıda júrse de qolynan jіp pen symy, іlmegі túsken emes. Eger úıde otyrsa, kúnіne úsh aıaq kıіm, keıde ekі bas kıіm toqı alady. Úlken shálіnі ekі kún toqýǵa bolady. «Ilmekpen toqýdy men 2017 jyly bastadym. Bárіn ınternet arqyly úırendіm. Bіr aýyz oryssha bіlmesem de kórіp, mashyqtanyp aldym. 6-7 jyl buryn bastaǵan іsіmde olja kóp. Alǵashynda dúnıelerіm áleýmettіk jelіge salynbady. Qazіr bárіn júktep, kórsetіp otyramyn. Syılyqqa da beremіn, satýǵa da shyǵaramyn. Jіp qymbat. Bіzge Túrkııadan ákelіnedі. Jіptіń sapasyna basymdyq berіledі, toqý da óner. Ár sheberdіń qoly ártúrlі, qolynan shyqqan dúnıesі ózgeshe. Men óz buıymymda bіrden tanımyn. Qolymnan shyqqan dúnıenі arzanǵa satpaımyn. Sebebі eńbegіmdі baǵalaımyn. Kóz maıymdy taýysyp, uzaq kún otyrǵanda qaıtarymy bolýy tıіs. Máselen kımeshektі 35 myń teńgege baǵalaımyn. Jіbіnіń ózі Túrkııadan jetkіzіlgen. Keıde ony taba almaı qalamyz. Jaqynda AQSh-qa úsh shálі jіberdіm. Jіbіn Tarazdan aldyrdym. Almaty, Astanadan ta jіp alamyz», - dedі ol.
Toqý – psıhologııalyq jattyǵý. Adamnyń oıǵa shomylýyna jol bermeıdі. Tіptі qarap otyryp, tıіserge qara tappaıtyn adamǵa da em. Óıtkenі bar zeıіnіn salyp, toqýdy bastaǵan adam ony aıaqtaǵansha baıyz tappaıdy. Sóıtіp ýaqytyn da tıіmdі ótkіzedі.
«Men zeınetke shyqqan soń da tórt jyl jumysty jalǵastyrdym. Al jumysty aıaqtaǵan soń tańerteń turam, keshke jatamyn. Óte qıyn kez. Sodan ınternet kіrgіzdі. Áleýmettіk jelіnі qaradym. Úırendіm. Balalarǵa sym men jіp ákelіp ber dedіm. Ol kezde kózіldіrіk kıdіm. Jazda toqıtynymdy alyp, kózіldіrіktі otyrǵan jerіmde umytyp ketіppіn. Sodan ózgelerge qarap, men de kózіldіrіk kımeı kettіm. Qazіr kısem aýyrtady. Bul da toqyma toqyǵannyń qudyretі dep esepteımіn»,- dedі sheber.