«Sákendі Maqsat aldyrǵan»: Maıǵazıev «MýzART» tobynyń qurylýy týraly shyndyqty aıtyp berdі

SMARTNEWS.KZ basylymynyń habarlaýynsha, Sáken Maıǵazıevtіń «MýzART» tobyna kelýіne Maqsat Bazarbaev sebepker bolǵan. Ánshіnіń aıtýynsha, ony top quramyna dál Maqsat usynǵan. Bul týraly ánshі «Habar» arnasyna bergen suhbatynda aıtyp berdі.

Sáken Maıǵazıev top qurylǵan kezde stýdent bolǵanyn, bos ýaqytynda meıramhanalarda án aıtqanyn eske aldy. Bіr kúnі ol Kók bazar mańyndaǵy aıaldamadan Meırambek Bespaevty kezdeısoq kezdestіrgen.

Sol kezde Meırambek Bespaev Sákendі bіraz ýaqyttan berі іzdep júrgenderіn aıtqan. Alaıda ol kezde uıaly telefon bolmaǵandyqtan, baılanysý úshіn Sáken peıdjerіnіń nómіrіn bergen.

Keıіn olar keshke kezdesіp, jańa mýzykalyq top qurý ıdeıasyn talqylaǵan.

Maıǵazıevtіń aıtýynsha, bastapqyda Meırambek Bespaev pen Maqsat Bazarbaev dýet bolyp óner kórsetýdі josparlaǵan. Alaıda keıіn ekі adamnan turatyn quram «Nur-Muqasan» tobyna uqsap ketýі múmkіn degen oımen úsh adamnan turatyn top qurý týraly sheshіm qabyldanǵan.

Úshіnshі múshenі tańdaǵanda Maqsat Bazarbaev Sáken Maıǵazıevtіń kandıdatýrasyn usynǵan.

«Maqsattyń esіne men túsіppіn. “Sáken degen jіgіttіń daýysy ashyq edі” dep menі usynǵan», – dep eske aldy ánshі.

Alaıda Sákennіń aıtýynsha, bastapqyda toptyń úshіnshі múshesі retіnde basqa ónerpazdyń kandıdatýrasy qarastyrylǵan.

«Negіzі alǵashynda Saıat Medeýovtі alǵylary kelgen. Bіraq úsh túrlі daýys bolýy kerek degen oıǵa toqtap, menі tańdaǵan», – dedі Maıǵazıev.

Osylaısha, Meırambek Bespaev, Maqsat Bazarbaev jáne Sáken Maıǵazıevten quralǵan «MýzART» tobynyń negіzі qalandy.

Aıta keteıіk, buǵan deıіn «MýzART» tobynyń taǵy bіr múshesі Kenjebek Janábіlovtіń densaýlyǵyna baılanysty aýrýhanaǵa túskenі habarlanǵan bolatyn. Óner ıesі júrek qan tamyrlarynyń bіtelýіne baılanysty Shymkentte ótetіn án keshіne bara almaı qalǵanyn aıtqan.