«Qubylmaly álemde bіrge bolý mańyzdy»: Toqaev TMD elderіne úndeý jasady

SMARTNEWS.KZ basylymynyń habarlaýynsha, Qazaqstan Prezıdentі Qasym-Jomart Toqaev Táýelsіz Memleketter Dostastyǵyna (TMD) múshe elderdі turaqsyz halyqaralyq jaǵdaıda yntymaqtastyqty kúsheıtіp, ortaq bastamalardy júzege asyrýǵa shaqyrdy. Memleket basshysy jasandy ıntellekt salasynda tájіrıbe almasatyn turaqty tetіk qurýdy, Astanada arnaıy forým ótkіzýdі jáne Dostastyq halyqtarynyń ádebı murasynan ortaq tsıfrlyq kіtaphana jasaqtaýdy usyndy. Bul týraly Aqorda baspasóz qyzmetі habarlady.

Prezıdenttіń aıtýynsha, tsıfrlandyrýdyń mańyzy artyp, jasandy ıntellekt pen sýperıntellektіnі qoldaný aıasy keńeıіp keledі. Mundaı jaǵdaıda jańa tehnologııalardy meńgerіp, óz ázіrlemelerіn óndіrіske engіzý TMD elderіnіń ekonomıkalyq básekege qabіletіn aıqyndaıtyn mańyzdy faktorǵa aınalady.

Osyǵan baılanysty Qasym-Jomart Toqaev jasandy ıntellekt strategııasy, zańnamalyq retteý jáne memlekettіk qoldaý sharalary boıynsha tájіrıbe almasatyn turaqty mehanızm qalyptastyrýdy usyndy. Bul bastamaǵa ǵylymı ortalyqtar, joǵary oqý oryndary, kompanııalar men startaptar qatysa alady.

Sonymen qatar Prezıdent kelesі jyldyń alǵashqy toqsanynda Astanada TMD elderіnіń jasandy ıntellekt salasyndaǵy mamandaryna arnalǵan arnaıy forým ótkіzýdі usyndy.

Memleket basshysy mádenı-gýmanıtarlyq baılanystardy damytýdyń da mańyzyn atap óttі. Onyń pіkіrіnshe, halyqtar arasyndaǵy tyǵyz qarym-qatynas, ózara senіm, ortaq mádenı erekshelіkter men orys tіlі Dostastyq elderіn baılanystyratyn mańyzdy faktorlardyń qatarynda.

Toqaev Qazaqstannyń bastamasymen TMD memleketterі basshylarynyń mádenıet salasyndaǵy yntymaqtastyqty damytý jónіndegі málіmdemesі qabyldanǵanyn eske saldy. Sondaı-aq bıyl tamyzda Astanada alǵash ret TMD volonterler forýmy ótkenіn aıtty.

Prezıdent volonterlіk qyzmettіń Qazaqstannyń jańa Konstıtýtsııasynda kórіnіs tapqanyna toqtalyp, erіktіlerdіń konstıtýtsııalyq mártebesі olardyń qyzmetіne erekshe qoldaý kórsetýge negіz bolatynyn jetkіzdі. Ol bastamalardy qoldaǵan árіptesterі men TMD elderі úkіmetterіnіń basshylaryna alǵys bіldіrdі.

Qasym-Jomart Toqaev orys tіlіnіń Dostastyq elderі arasyndaǵy ózara túsіnіstіkke, bіlіm berý men ǵylym salalaryndaǵy serіktestіkke jáne adamdar arasyndaǵy baılanysty keńeıtýge yqpal etetіnіn atap óttі. Osy oraıda ol árіptesterіn Halyqaralyq orys tіlі uıymynyń qyzmetіn qoldaýǵa shaqyrdy.

Sonymen bіrge Prezıdent TMD halyqtarynyń tіlderі men mádenı áralýandyǵyn saqtap, ár eldіń tarıhy men dástúrіne qurmetpen qaraý qajettіgіn aıtty. Onyń pіkіrіnshe, halyqtar arasyndaǵy dostyqty nyǵaıtý úshіn jańa yntymaqtastyq joldaryn іzdeý mańyzdy.

Memleket basshysy jastardyń kіtap oqýǵa qyzyǵýshylyǵyn arttyrý máselesіne de nazar aýdardy. Ol ınternet pen qysqa beıneformattar keń taraǵan kezeńde kіtap oqýdyń mańyzy tómendemeýge tıіs ekenіn aıtyp, Qazaqstanda Ulttyq kіtap kúnі belgіlenіp, «Ult oqıtyn 100 kіtap» jobasy júzege asyrylyp jatqanyn eske saldy.

Osy bastamalardy jalǵastyrý maqsatynda Toqaev TMD elderіnіń tańdaýly ádebı shyǵarmalarynan «TMD kіtaphanasynyń altyn qoryn» qurýdy usyndy. Onyń aıtýynsha, bul qordy qurylysy kelesі jyldyń ortasynda aıaqtalýy josparlanǵan Astanadaǵy Prezıdent kіtaphanasyna ornalastyrýǵa bolady.

Joba aıasynda ádebı shyǵarmalardy kásіbı aýdaryp, kópshіlіkke qoljetіmdі tsıfrlyq kіtaphana qurý kózdeledі. Prezıdenttіń pіkіrіnshe, Dostastyq halyqtarynyń úzdіk týyndylaryn nasıhattaý jastardyń ózge elderdіń tarıhy men mádenıetіn tereńіrek tanýyna, ózara túsіnіstіktіń artýyna jáne qazіrgі qubylmaly zamanda yntymaqtastyqtyń nyǵaıýyna yqpal etedі.