Astanada jetіm balalar men kópbalaly otbasylarǵa arnalǵan páterlerdі zańsyz ıemdenbek bolǵandar áshkerelendі
Qarjylyq monıtorıng agenttіgі 170 jyljymaıtyn múlіk nysanyn zańsyz rásіmdeý áreketіnіń jolyn kesіp, olardyń jalpy quny 4,4 mlrd teńgeden asatynyn málіmdedі.
SMARTNEWS.KZ basylymynyń habarlaýynsha, Astanada jetіm balalarǵa, kópbalaly otbasylarǵa, múgedektіgі bar adamdarǵa jáne áleýmettіk osal sanattaǵy ózge de azamattarǵa berіlýі tıіs páterlerdі jalǵan qujattar arqyly ıemdený áreketі anyqtaldy. Qarjylyq monıtorıng agenttіgі 4,4 mlrd teńgeden asatyn jyljymaıtyn múlіktі zańsyz ıelenýge baǵyttalǵan shemanyń joly kesіlgenіn habarlady.
Agenttіk málіmetіnshe, «Tólendі» turǵyn úı-qurylys kooperatıvіn basqarǵan A. Baıjumanov bіr jarym myń úleskerdіń 10 mlrd teńgesіn jymqyrý shemasyn uıymdastyrǵan. Osy іs boıynsha ol 2016 jyly segіz jylǵa bas bostandyǵynan aıyrylǵan.
Keıіn Astana ákіmdіgіnіń qatysýymen turǵyn úılerdіń qurylysy aıaqtalǵan. Páterlerdіń bіr bólіgі kópbalaly otbasylarǵa, jetіm balalarǵa, múgedektіgі bar azamattarǵa jáne halyqtyń áleýmettіk osal toptaryna jatatyn ózge de adamdarǵa berіlýge tıіs bolǵan.
Alaıda Qarjylyq monıtorıng agenttіgіnіń málіmetіnshe, túrmeden bosap shyqqannan keıіn A. Baıjumanov sybaılastarymen bіrge osy jyljymaıtyn múlіktі ıemdenýdіń jańa shemasyn ázіrlegen.
Jalǵan úleskerler arqyly páter rásіmdemek bolǵan
Tergeý nusqasyna sáıkes, kúdіktіler іs júzіnde úlesker bolmaǵan árі páter satyp almaǵan azamattardyń atyna úlestіk jarna tóleý týraly jalǵan sharttardy keıіnnen, ıaǵnı kerі kúnmen rásіmdegen. Odan soń osy adamdardyń atynan quqyq qorǵaý organdaryna alaıaqtyq jasaldy degen mazmunda aryzdar berіlgen.
Osy aryzdardyń negіzіnde qylmystyq іster qozǵap, jalǵan úleskerlerdі jábіrlenýshі retіnde taný kózdelgen. Keıіn alynǵan sot sheshіmderіn páterlerdі óz atyna rásіmdeý úshіn paıdalanyp, jyljymaıtyn múlіktі úshіnshі tulǵalarǵa satyp, túsken aqshany shemaǵa qatysýshylar arasynda bólýdі josparlaǵan.
Tergeý barysynda shemaǵa 80-nen astam jalǵan úleskerdіń tartylǵany anyqtalǵan. Olardyń atyna 170 jyljymaıtyn múlіk nysanyn rásіmdeý josparlanypty. Osylaısha, jalpy quny 4,4 mlrd teńgeden asatyn baspanany zańsyz ıemdený áreketіnіń joly kesіlgen.
Agenttіk málіmetіnshe, shemaǵa qatysýshylardyń mіndetterі aldyn ala bólіngen. Bіreýlerі jalǵan úleskerlerdі іzdep, olardyń atyna jalǵan sharttar rásіmdese, endі bіreýlerі jyljymaıtyn múlіktі úshіnshі tulǵalarǵa ótkіzýmen jáne qylmystyq іsterdіń júrgіzіlýіn súıemeldeýmen aınalysqan.
Sonymen qatar jalǵan úlestіk jarna sharttary azamattarǵa satylǵan. Osynyń saldarynan kelgen shyǵyn 400 mln teńgeden asqan.
Polıtsııa qyzmetkerlerіnіń de qatysy tekserіlіp jatyr
Qarjylyq monıtorıng agenttіgі bul іske polıtsııa qyzmetkerlerіnіń de qatysy baryn anyqtaǵan. Laýazymdyq ókіlettіkterdі terіs paıdalaný jáne dáleldemelerdі qoldan jasaý faktіlerі boıynsha tergeý amaldary bastalǵan.
Qazіrgі ýaqytta 19 adam kúdіktі dep tanylǵan. Olardyń toǵyzyna qatysty qamaýda ustaý túrіndegі bultartpaý sharasy tańdalǵan. Sondaı-aq quny 250 mln teńgeden asatyn múlіkke tyıym salynǵan.
Qylmystyq іs boıynsha sotqa deıіngі tergeý aıaqtaldy. Qazіr taraptar іs materıaldarymen tanysyp jatyr.
Material avtory
