Reseılіk ánshі Navai-dіń advokaty Tarazdaǵy tergeý ızolıatoryndaǵy jaǵdaı týraly aıtty

Qazaqstanda ustalǵan reseılіk reper Navai-dіń advokaty Rena Kerımova ony bas bostandyǵynan aıyrýdyń ornyna aıyppul salýǵa qol jetkіzýge tyrysatynyn málіmdedі. Sondaı-aq ol mýzykanttyń Tarazdaǵy tergeý ızolıatorynda qandaı jaǵdaıda otyrǵanyn aıtty. Bul týraly RIA Novostı agenttіgіne habarlady.

Advokattyń sózіnshe, qorǵaý tarapy reperge aıyppul taǵaıyndalýyn talap etedі. Ol Navai-dіń buryn sottalmaǵanyn, mіnezdemesіnіń jaqsy ekenіn jáne kópshіlіkke tanymal tulǵa ekenіn alǵa tartqan.

«Bіz oǵan aıyppul salynýy úshіn kúresemіz. Bul onyń alǵashqy ret jaýapqa tartylýy, buryn sottalmaǵan, mіnezdemesі jaqsy, tanymal adam. Nege oǵan bіrden bas bostandyǵynan aıyrý jazasyn taǵaıyndaý kerek?» – dedі Kerımova.

Advokat jeksenbі kúnі keshke reperdі qamaýǵa alý týraly sheshіmge shaǵym túsіrýdі josparlap otyr. Onyń aıtýynsha, qorǵaý qujattardy daıyndaýy kerek, al sot shaǵymdy kelesі aptada qaraýy múmkіn. Iste bіr ǵana epızod bar bolǵandyqtan, advokat sot protsesі uzaqqa sozylmaıdy dep esepteıdі.

Sonymen qatar ol Navai-dіń kepіlmen bosatylýyna kepіldіk joq ekenіn atap óttі. Buǵan reperdіń shetel azamaty bolýy sebep. Advokat yqtımal kepіl somasyn jarııalamady.

Kerımovanyń málіmetіnshe, mýzykant qazіr Taraz qalasyndaǵy tergeý ızolıatorynda otyr jáne qamaýdaǵy jaǵdaıǵa qatysty shaǵym aıtpaǵan.

«Ol eshteńege shaǵymdanbaıdy. Oǵan óte jaqsy qaraıdy, bárі qalypty. Oǵan sálem-saýqat ákelіp turady. Onymen bіrge bolǵan adamdar qazіr bostandyqta, turmystyq máselelerіmen solar aınalysyp júr», – dedі advokat.

Navai Qazaqstanda ne úshіn ustaldy?

Eske salaıyq, 14 qazanda uıymdastyrýshylar sol kúnі keshke ótýі tıіs bolǵan reperdіń kontsertіnіń toqtatylǵanyn habarlady. Keıіn Jambyl oblysynyń polıtsııa departamentі Navai-dіń esіrtkі kontrabandasyna kúdіkpen ustalǵanyn málіmdedі. Osy derek boıynsha qylmystyq іs qozǵalyp, mýzykant ýaqytsha ustaý ızolıatoryna qamalǵan.

Reperdіń dırektory Raýf Gýsanov onyń ustalýyna qatysty pіkіr bіldіrýden bas tartqan. Al anasy bolǵan jaǵdaıdy «astyrtyn uıymdastyrylǵan áreket» dep atap, ulynyń jaqyn arada bosatylatynyna senіm bіldіrgen.

Osy oqıǵadan keıіn Qyrǵyzstanda da tekserіs bastaldy. Shekara qyzmetі mýzykanttyń esіrtkіmen shekaradan qalaı ótkenіn anyqtap jatyr. Tekserіs nátıjesіnde kіnálіler jaýapqa tartylýy múmkіn.

15 qazanda buqaralyq aqparat quraldarynda sot sanktsııasymen Navai-dіń ekі aıǵa qamaýǵa alynǵany týraly aqparat tarady. Jambyl oblysynyń polıtsııa departamentі bul málіmettі rastady.

Keıіn Reseıdіń bas konsýldyǵy Qazaqstan Syrtqy іster mınıstrlіgіnіń ókіldіgіne nota joldady. Qazaqstannyń Syrtqy іster mınıstrlіgі mundaı árekettі konsýldyq jumystaǵy qalypty tájіrıbe dep túsіndіrdі.