RUS
Ókіlder palatasynyń spıkerі Kevın Makkartı men basqa da Kongress kóshbasshylaryna jazylǵan hatta Iellen hanym amerıkalyq zań shyǵarýshylarǵa memlekettіk qaryzdyń shektі somasyna baılanysty kelіsіm ornatý úshіn naqty shektі merzіmdі kórsettі. Shektі somma degenіmіz – AQSh úkіmetі shyǵyndaryn óteý úshіn zańdy túrde qaryzǵa ala alatyn qarjy.
Buǵan deıіn Iellen AQSh úkіmetіnіń aqshasy 1 maýsymda taýsylyp qalýy múmkіn ekenіn boljaǵan. Eldegі jetіspeýshіlіktі qysqartýǵa tyrysyp jatqan AQSh prezıdentі Djo Baıden men Kongresstegі Respýblıkalyq partııa ókіlderі álі de elde buryn-sońdy bolmaǵan defolttyń aldyn alý týraly sheshіmge qatysty kelіspeýshіlіkterdі joıýǵa tyrysyp jatyr.
«Eń keıіngі qoljetіmdі derekterdі negіzge alsaq, eger Kongress memlekettіk qaryz shegіn 5 maýsymǵa deıіn kótermese nemese toqtata turmasa úkіmettіń mіndetіn oryndaýǵa qazynada qarjy jetkіlіksіz bolmaq», - dep atap óttі Iellen hatynda.
Sondaı-aq ol 130 mıllıard AQSh dollarynan astam qarjy, jospar boıynsha, aldaǵy aıdyń alǵashqy ekі kúnіnde áleýmettіk qamtamasyz etýge jumsalatynyn jazdy, al 5 maýsymnan bastap 1 apta іshіnde qosymsha shyǵyndarǵa shamamen 92 mıllıard AQSh dollary kerek.
Sonymen qatar qarjy mınıstrі Kongress basshylaryn kelіsіmge tezіrek kelýge shaqyryp, «memlekettіk qaryzdyń shegіn tómendetýdі nemese ulǵaıtýdy sońǵy mınýtqa deıіn kútý bızneske jáne tutynýshylardyń senіmіne aıtarlyqtaı zııan keltіrіp, salyq tóleýshіler úshіn qysqa merzіmdі qaryz alý qunyn arttyryp, AQSh-tyń nesıe reıtıngіne terіs áser etýі múmkіn ekenіn» aıtty.